"الراجل اللي قال هايل بعد خطاب الفنجري".."صباع واحد بيهددنا كلنا"

لأول
مرة شهدت مصر ثلاث خطابات مصيرية في أقل من 62 ساعة، أولها خطاب الدكتور
عصام شرف، رئيس الوزراء، السبت الماضي، ليعود بعدها شرف ليلقي خطابه الثاني
بعد يومين، وأخيرًا بيان المجلس العكسري الذي ألقاه اللواء محسن الفنجري،
عضو المجلس الأعلى للقوات المسلحة.


وقد قوبلت خطبتي رئيس الوزراء بوابل من الإنتقادات اللاذعة على موقعي
التواصل الاجتماعي "فيسبوك" و "تويتر"، حيث وصفت التعليقات والتويتات خطاب
شرف الأول بأنه خالي من أي جديد، فهو كالمُسكن لا أكثر، بينما وصفوا خطابه
الثاني بخطاب مبارك الأخير قبل تنحيه، متوقعين ظهور يحيى الجمل، نائب رئيس
الوزراء السابق، ليلقي بعد ذلك خطاب تحني شرف وخلف الراجل اللى هيقف ورا
يحيي الجمل.


ومع تزايد حدة الإنتقادات على خطاب شرف الثاني، انتقلت الدفة إلى
اللواء محسن الفنجري عقب انتهائه من سرد البيان العسكري، الذي طغت عليه
نبرة شديدة اللهجة، مما أثار حالة من الجدل الواسع بين مؤيد للخطاب بوصفه
بيانا حازما من القوات المسلحة، ومعارض باعتباره يحمل تهديدًا صريحًا
للثوار.



وعلى الفور انتقلت حالة الجدل إلى "فيسبوك" و "تويتر"، فقام مسئول
صفحة "اللواء محسن الفنجري" على "فيسبوك"، والتي وصل عدد مشتركيها إلى 98
ألف فيسبوكي، بإلغاء الصفحة عقب البيان احتجاجًا على لغة التهديد في الخطاب
الذي وصفه "التحريضي" وانتشرت على "فيسبوك" في غضون ساعات أكثر من 150
صفحة تحمل مسميات متشابهة مثل "احنا مبنتهددش يا فنجري"، "صباع الفنجري"،
"لا لصباع الفنجري"، "الفنجري والصباع".


"صباع الفنجري" أصبح الآن حديث الشارع الفيسبوكي بعد أن كان "الصباع
البمبي" هو الصباع الوحيد لمواقع التواصل الاجتماعي عقب الاستفتاء، وبعد
"الراجل اللي واقف ورا عمر سليمان"، "الست اللى واقفه ورا القذافي"، جاء
الدور على "الراجل اللي قال هايل بعد خطاب الفنجري"، فجاءت أبرز التعليقات
والتويتات الرافضة لبيان الفنجري على النحو التالي:


‎الفنجري كان مخيف لدرجة أن المرة دي الشهداء هما اللي ضربوا له تعظيم سلام

 هو البني أدم إيه غير صوابع وشوية حاجات كده فوق بعض

 سؤال لولبي: لماذا الجيش لم يخاطب البلطجية بهذة اللهجة الحادة وخاطب الشعب بها؟

 يا فنجري يابو صباع وحنجره وطقيه إلى في الميدان ثوار مش شوية بلطجية، مش كدة ولا اية؟

 اللي في التحرير .. دول ولاد البلد ديه

 المجلس العسكري صباع واحد بيهددنا كلنا

 قرر المجلس الأعلى بتغير النشيد الوطني "صباعي صباعي صباعي لك حبي وفؤادي"

 بعد ما حدث اليوم..أطباء مصر يؤكدون أن أهم جزء في جسم الإنسان هو الصباع وليس القلب

 اللي صباعه من زجاج مايحدفش الناس بالقنابل المسيلة للدموع

 بيقولوا كل واحد ليه نصيب من أسمه، حد خد باله أن فنجر، يعني صباع بالانجليزي؟

 القذافي: كلمة فنجري مكونه من جزئين

1- فنجر وهو الصباع باللغة الأجنبية (ولم يحدد أنهي صباع)

2- جري ودا اللي هيعملوه المجلس قريب جدًا

 عاجل جدًا :تجرى مباحثات مكثفة حاليًا لإقامة مراسم تسليم واستلام (الصباع) غدًا في ميدان التحرير ...والله الموفق والمستعان.

 عااااااجل المشير طنطاوي "ما فعله الفنجري طيش شباب وعلى الثوار ألتماس العذر"

 صبع صبع يا عم الحج

 القيادة ادب مش هز صباع

 سقط القناع وظهر الصباع

 الله ....الوطن ...الصباع

 الفنجري مش بس بكلمته .. الفنجري بصباعه وطقيته

 اللوا الفنجري أنا زي المليجي طيب خالص بس المشير هو إللي بيحصرني في أدوار الشر

 إنهيار أسطورة الفنجري في 4 دقايق و37 ثانية

 أرفع صباعك فوق أنت فنجري

 أخبار عام 2051

استمرار حبس الشريف وسرور ١٥ يوم على ذمه التحقيق

مبارك يعاني من ألتهابات في صوابع رجله

تاجيل الانتخابات والاعلان الدستوري لسبتمبر ٢٠٥٢

الخيم تملئ ميدان التحرير استعدادًا لجمعة ٤٠ سنة وأحنا لسة هنا

قبل وفاته عن عمر حوالي ٧٠ عاما قائد شباب ثوره ٢٥ يناير ٢٠١١ يطالب
أحفاده بالاستمرار لتحقيق المطالب والقضاء علي فلول النظام السابق



أما على الجانب الأخر فقد دافع مؤيدو البيان عن اللواء الفنجري، واصفين
خطابه بأنه تهديد لكل من تسول له نفس العبث باستقرار وأمن مصر، مضيفين أن
القوات المسلحة كانت ولا تزال الدرع الحصين لمصر وخط أحمر لا يمكن تجاوزه
على الأطلاق، كما أشاروا أن البيان جاء بدافع الحفاظ على استقرار مصر،
مؤكدين أن المجلس العسكرى كان حاميًا لثورة 25 يناير عندما رفض الإعتداء
على أي متظاهر.


كما هو الحال دائمًا، فقد انتشرت على صفحات رافضة لأي إهانة للمجلس
الأعلى للقوات المسلحة في شخص اللواء الفنجري، فتم تدشين أكثر من 100 صفحة
تحت مسميات "كلنا مع الفنجري"، "الصفحة الجديدة للواء الفنجري"، "الفنجري
في القلب"، "أحنا أسفين يا فنجري"، وجاءت أبرز التعليقات والتويتات المؤيدة
لبيان الفنجري على النحو التالي:


 إيه يعني عيب؟ محدش بيعمل كده خالص؟ هو المفروض يكتفوه يعني؟ بنسيب
كل حاجة ونعلق على دي؟ هو مبارك بقى شبح الكل المفروض يتجنب يعمل أي حركة
بيده أو يقول كلمة في اللغة العربية هو قالها؟؟؟ حاجة عجييبة.

 عيب كده..خلي الناس إللي مسكة البلد تحميكوا بدل مايسبوكم ويبقا منكم
للشرطة ونرجع نقف تحت البيوت طول الليل زي زمان، متبقوش ناكرين للجميل
وتمشوا ورا ناس ليها مصالح شخصية وسياسية وكل واحد عاوز ياكل حتة من
التورتة قبل غيروا وميهموش مصلحة البلد

 الخطاب كان قوي جًدا جدًا وكل كلمة فيه بتدل على وطنية صادقة وأحنا
معاكم وملكوش دعوه بالي بيقولو أنهم بيمثلوا الشعب، أنا من الشعب ومش
موافقة على إلى بيعملوه

 أصحى يا مصري و صحي النوم .... جيشك عمره ما باعك يوم

 سيادة اللواء الفنجري راجل محترم ومحبوب من جميع رؤساؤه ومرئوسيه
اللي خدموا معاه .. ومش عشان بيقول بيان يوقف فيه شويه المرتزقه دول عند
حدهم بدل ما يخربوا البلد، يبقى وحش وننتقص من قدره .. تحياتنا للقائد
العظيم

 الجيوش عند جيرنا قاعدين يقتلو فيهم زي الصراصير والفيران بلا رحمة،
وأحنا علشان سيادة اللواء طالع زعلان علي البلد وإلا بيحصل فيها ومتعصب
شويه بقي الجيش كوخة، إزاي وإزاي يزعق أو يشاور بصباعه ونسينا وقفة الجيش
مع الشعب والثورة

 عجبي على دي بلد أما نشوف هيودونا لحد فين

 بصراحه الراجل مغلطش، ولا لما يحي الشهداء يبقى سكر ولما يكون حازم
وصارم عشان يحافظ على مصر اللي مات عشانها الشهداء يبقى كخه وكمان في حاجه
مهمه جدآ، السياسه مش أنك تأخد حقك كله وقت المظاهرة، بس تبقى وصلت رسالة،
وأنا بتكلم في السياسه مش في أحكام القضاء

 أفتكر ان من كام شهر الناس كلها عابت على المجلس أدبه وحنيته وقالت
عليه مجلس الأونس ... دلوقتي لما أتكلم بحزم كله زعل منه ؟!! هو فيه إيه؟


ولا يسعنا إلا أن نتوجه بكامل الأحترام إلى شخص اللواء محسن الفنجري،
ومعتصمي ثورة الغضب الثانية، فالأمانة الصحفية التي نص عليها ميثاق الشرف
الصحفي، تدفعنا إلى عرض الرأى والرأى الآخر، دون المساس أو التجريح لأي طرف
من الأطراف.