حسام لجوزيه "انت قلبك قاسى اوى اوى".. هو ده اللعب النظيف يا أبوالليف

لم
تقل ساحة موقع التواصل الاجتماعي "فيسبوك" سخونة عن أحداث "دربي" كرة
القدم بين طرفي الكرة المصرية الأهلي والزمالك، الذي انتهى بتعادل مثير
بهدفين لكل منهما، فما أن أطلق الهولندي كيفن بلوم صافرة النهاية، حتى بدأت
المناوشات على مئات الصفحات الأهلاوية والزمالكاوية.


وعلى طريقة إعلان "شيبسي ديلايتس" يقول الأهلاوية "الزمالك طول عمره
مذلول ومحمص .. محروق ومتقرطس..مهو بقاله 100سـنه ماطورش نفسه..هما قالو ان
كده كفايه والزمالك مش هيكسب تاني..واخترنا الأقرع وأخوه..وسمناه الزمالك
ديلايتس وعملناه بخطين حمر وبجلابية وشبشب..الزمالك ديلايتس فريق عمره
ماهـياخد الدوري" تلك كانت داليا دودي، فأبرز التعليقات الأهلاوية جاءت
احتفالًا باقتراب درع الدوري من الجزيرة وابتعاده عن مية عقبة، ففي واحدة
من الصفحات الأهلاوية التي تسببت في "حرقة دم" للزمالكاوية، وجه الشياطين
الحمر "نصيحة لكل زمالكاوي: لو حابب تشوف درع الدورى ممكن تقطع تيكت فى
الجزيرة وتتدخل تتفرج عليه".



أما عن مدرسة الفن والهندسة فجاءت التعليقات نارية من جانب
الزمالكاوية، فيعلق إسلام نادر "تلاقي الأهلاوية قبل الماتش خايفين، وساعة
الماتش يبقى ممسوح بكرامتهم الأرض، ولما يتعادلوا في أخر الماتش يتنفسوا
الصعداء، ويقولك عمركوا بردوا ما هتكسبونا، وهو عرقان طول الماتش، عارفين
زي اللى راكب عربية مرسيدس ولابس شبشب بصباع"، وظل مشجعو الزمالك في الهجوم
على الخصم فيعلق أحمد محمد "والله طول عمري بقول كده، هما لما بيتعادلوا
بيعدوا يحضنوا بعض ولا كأنهم كانوا مغتربين عشر سنين في ليبيا".



"اعتبره (دوري) وراح، اعتبره (دوري) جراح، واتهد عاللي (كونيه)،
(المصري) خسرنا منه و(الاهلي) بعدناااا عنه نصيبنا..هنعمل إيه"، فالدندنة
الأهلاوية لم تتوقف بعد إحراز دومنيك الهدف الهدف الثاني للقمة المصرية،
حيث قاموا بمواساة الزمالكاوية على الأنغام العربية "لسه بتخاف من جوزيه لو
تيجي سيرته، لو شفت الاهلي بجد هتدمع عنيك، يعني الدوري بيوحشك لو شفت
صورته، بتحس ايه لما الدوري بيضيع بين ايديك، مين بيديك ستة تاني بعد مني،
فى حضن مين هيبات الدورى الا حضنى، حبيت أغيظك أعمـل أية أصل أنتا قارفني،
مش قصدى حاجة انا بس بتريق عليك".



فرسان القلعة البيضاء ردوا على استفزازات الأهلاوية بخصوص الهدف المثير
للجدل معلقين "يعني إيه كوك زيرو: يعني 2 لاعيبه مصابين وواقعين، ولاعيبه
الأهلي يرفضوا أنه يطلعوا الكورة بره لإنهم واخدين على الندالة .. من حقك
أن تفرح بتعادل فريقك مع فريقي حتى ولو بلعب لا مؤاخذه مش نظيف"، وكرر
الفرسان شكرهم للفانلة البيضاء "شكرًا لاعيبة الزمالك كنتم رجال و كم نتمنى
ان تكونوا هكذا دوما..سأظل مساندا و فخور انى زمالكاوي بتظلم وبكسب وخطئنا
الوحيد اننا نعتقد ان من امامنا سوف يلعب لعب نظيف حتى وإن كان هو غير
نظيف".





وانتقلت المناوشات إلى الحديث عن الكابتن حسام حسن، المدير الفني لنادي
الزمالك، "الهدف نقطة سوداء في المباراة وفي تاريخ المنافس، فماذا لو كان
اللاعب مصاب بسكتة قلبية؟ الكابتن حسام حزن أضاف للطب معلومة جديدة وإكتشاف
علمى مذهل أن الإنسان إذا أصيب بسكتة قلبية فإنه يمسك فخذته و يصرخ"، لترد
على تعليقات الزمالكاوية مروة حافظ "ده قصر ديل"، كما علقت أحدى الصفح
الأهلاوية على طريقة نجم الجيل "حسام حسن لما شد جوزية كان بيقوله..انت
قلبك قاسى اوى اوى انت مش بتحس كده و كده".





ودافع الزملكاوية بإستماتة عن مديرهم الفني، فصرحت سما حمدي "الناس
اللي بتتكلم عن العميد أنه مخدش الدوري، مش هو اللي بيلعب، يعني مش هو بس
اللي غلطان، وكمان الزمالك مسكه مدربين كتير مفيش حد عمل معاه اللي حسام
عمله، كفاية أنه رفع اسم الزمالك الموسم اللي فات"، فقلب محمد خضر الطاولة
على التعليقات الاهلوية "أهلي مين والناس نايمين، مهما تبع الشرطة الفاسدة
معاك معاك عليك عليك، حسام حسن راجل مش مان يا أهلوية".



عزيزى الاهلاوى: بقالك كتير معملتش خير؟ بقالك كتير مساعدتش محتاج ؟؟؟
رمضان قرب اية رأيك تشارك فى مشروع خيرى لكل زملكاوى ...انت عارف انة محتاج
ومحروم ومشافش الدورى من سنين مشروع رحلات خيرية انسانية مجانية ناخدهم
يتفرجوا على درع الدورى .. اهو يبقوا شافوة وعرفوا شكلة ويحكوا عنه
لولادهم" تلك رسالة توجهها الفانلة الحمراء إلى البيضاء، لننتقل إلى ستديو
تحليلي مع دوله الأهلاوي " لما الزمالكاوية دعو من قلبهم (الشعب يريد
الدوري يا عميد) نسيو حاجتين، الأولى ان الشعب هو الأهلي، والتانية ان أحمد
حسن هو العميد" ويختم ياسر غنيم الاستديو التحليلي من الإسكندراية "جوزيه
ده داهية، واللي بيتكلم عن الروح الرياضية يتفرج على ماتش 3-3، وهو هيعرف".



"أقسمنا لو توقفت الأرض عن الدوران، ولو أثمر شجـرالزيتون رمان، ولـو
الدم انتهى من الشريان ... لن اشـجـع ســوى الزمالك طـول الزمان" ذلك كان
نشيد عشاق القلعة البيضاء في رد سريع على رسالة الأهلوية، فيعلق أحمد
الخولي"لا عجب فيما فعل الأهلي اللي يراجع الماتشات اللي فاتت يلاقي أن
الاهلي اللي خصوصًا مع جوزيه لايعرف الروح الرياضية، واذا لم يكن لديهم روح
رياضية كان يفتكروا لاعيبه الزمالك في معسكرات المنتخب"، وأخيرًا وليس
آخرًا ختم محمد جيمي التعليقات البيضاء موضحًا أن "البعض بيسئل ليه الحكم
مش وقف الماتش علشان الأتنين اللي كانوا واقعين .. لأن جوزيه قال للاعب
الأهلب ألعب الأوت بسرعة، علشان كدا حسام راحله قاله هو ده اللعب النظيف يا
أبوالليف".


.