قبيلة بني هلال

بنو هلال

ينتسبون إلى هلال بن عامر بن صعصعة بن معاوية بن بكر بن هوازن بن منصور بن عكرمة بن خصفة بن قيس عيلان بن مضر بن نزار بن معد بن عدنان. وهي بالتالي تنتمي الي قبيلة بني عامر التي تنتمي بدورها إلى هوازن بن قيس بن عدنان كبرى القبائل العربية من حيث العدد والتفرعات على الاطلاق, والمعروف ان قيس بن عيلان هي المناظر للقبائل اليمانية منذ القرن الاول للهجرة وكانت قبائل بني سليم وبني عامر هي السيد الحقيقي لبوادي الجزيرة العربية طيلة العهدين الاموي والعباسي . وقد تسببت الصراعات الطويلة بين القبائل العدنانية "القيسية"والقبائل اليمانية في اضعاف واسقاط العديد من الدول والممالك الاسلامية لاسيما دولة بني امية وامارة الاندلس. وقد ساهمت قبيلة بني هلال في كل هذه الصراعات إلى ان انتهى بها الحال كمؤيد للقرامطة وهي حركة باطنية ارتكبت العديد من الفظائع لاسيما في البحرين ( شرق الجزيرة العربية بالكامل كان يسمى البحرين ) او في الحجاز او نجد.

والحقيقة ان تاييد قبائل بني هلال وغيرهم من القبائل لحركة القرامطة لم يكن نابع من منطلق عقدي فهم لم يكن يهمهم كبدو اي مسألة عقدية ويكفي ان يصلي احدهم ليعتبر تقيا وملتزما وقد دخل القرامطة في صراع مع الدولة الفاطمية في منطقة الشام ادي بالفاطميين للقضاء على القرامطة وترحيل اشياعهم من القبائل إلى مصر ومنطقة شرق النيل بالتحديد حيث بقوا لفترة من الزمن تربوا على القرن إلى ان حصل تمرد من قبل والى افريقيا المعز ابن باديس فما كان من الخليفة الفاطمي الا ان رماه بقبائل بني هلال ومن معهم طبقا لنصيحة وزيره اليازوري فكانت ماسمي فيما بعد في التاريخ الاسلامي بهجرة بني هلال التي دخلت بدورها إلى التراث العربي فيما سمي بتغريبة بني هلال الملحمة العربية الوحيدة التي تروى من المغرب وحتى البحرين وقد ادى دخول جموع قبائل قيس عيلان المتمثلة في بني سليم وبني هلال وجشم وعدوان وفزارة و المعقل وبعض البطون من عدد من القبائل العربية القادمة من الجزيرة ادت إلى تعريب المنطقة الواقعة بين الاسكندرية والمغرب بنسبة 90% وانتشرت بطون بني هلال وبني سليم وتوزعت وفرقتها الحروب والكروب والكثرة والى سبعينيات القرن المنفرط كانت نجوع هذه القبائل تتجول في افريقيا الشمالية.

على إنه ظلت لبني هلال بقية في مصر حتى اليوم، و قد ذكر القلقشندي و الحمداني وجودهم بصعيد مصر و قد عاشا في العصر المملوكي بينما التغريبة تمت في العصر الفاطمي.

ولم تنتقل قبيلة بني هلال جميعها.بل ان بعض بطون هذه القبيلة فضل البقاء في نجد بالرغم من الجفاف الشديد.

وخلقت تغريبتهم وحروبهم الطاحنه مع الزناتي حاكم تونس من الاشعار والقصائد ما يشيب له الرأس فقد بلغت أبيات الشعر ما يقارب المليون بيت وكانت الجازية الهلالية من الفاعلين الأساسيين في تغريبة بني هلال المشهورة. قيل انها احتكرت ثلث المشورة في مجلس الشورى لقومها ومجلس حربهم نظرا لرجاحة عقلها وحسن تدبيرها وصواب المشورة والحكمة والروية. من أجل قبيلتها بني هلال تركت زوجها "شكر الهاشمي" صاحب مكة الذي كانت تحبه، ولا ترضى برجل غيره، والذي أنجبت منه ولدًا اسمه محمد، ولم يغلبها على هذه العاطفة الخاصة إلا العاطفة العامة تجاه قبيلتها؛ والتي تستوجب سفرها معهم إلى تونس لحاجتهم إلى مشورتها وتحميسا لهم على النصر؛ ولذا فارقت زوجها الذي آثرت وولدها الذي أحبت، وفارقت رغد العيش معه إلى جفوة الحياة القاسية التي تقوم على النقلة والحرب. والجدير بالذكر أن المرأة في بني هلال كانت لاعبًا أساسيًا في مختلف مظاهر الحياة وليست الحياة السياسية وحدها والأمثلة كثيرة، مثل شيحة أخت الأمير أبي زيد، وخضرة الشريفة والدته، وواصفة ابنة دياب بن غانم.


ولا يزال لهم بقية في المغرب العربي ولكن اكثرهم قد اختلف عليه النسب بسبب التداخل القوي مع اهل المغرب ويصعب تحديد الهلالي في بلاد المغرب الا ما ندر. وبقيتهم في الجزيرة العربية فهم بعض بطون قبيلة "سبيع" الوقت الراهن.والذين فضلو البقاء في نجد

بنو هلال في مصر
حاليا يوجدون بقرية نجع هلال بمركز ادفو محافظة اسوان بصعيد مصر
حيث يتعايش عدد كبير من القبائل العربية التى استقرت منذ أمد بعيد,
تتوزع هذه القبيلة الى عدة بطون وعشائر منها على سبيل المثال لا الحصر:
العزايزة والكوايد والجواويد والمقالدة والرشاوين والدروعة والمناوية.
وتنقسم المناوية الى عدة عائلات مثل المجلبين والبلالات وابناء سليم وابناء عطية والدريسات والقراقير والغوال والبدورة.






بنو عقيل أو العقيليين

نسب القبيلة
ذكر العلامة القلقشندي في صبح الأعشى، ونهاية الأرب أن العقيليين بطن من ثعلبة من طيئ القحطانية، وبعد خروج ثعلبة وبطونها سكنت قادمة من نجد في فلسطين ثم نزلوا إلى سيناء ومصر في عهد الدولة الأيوبية.
كما ذكر أحمد لطفي السيد ونعوم بك شقير عن العقايلة بأنها من قبائل ساحل سيناء الشمالية في منطقة قاطية، ونزل منهم في وادي النيل في الشرقية بمركز فاقوس وصعيد مصر. ومن أشهرعشائرها:
الكليبات، والنجاتية والفراجوة.







بنو عقيل أو العقيليين في مصر
هم من بطون قبيلة طئ,دخلوا إلى أرض مصر إبان حكم السلطان الناصر صلاح الدين الأيوبي قادمين إليها من فلسطين ومعان بجنوب الأردن والتي إستقروا بها زمنا حيث كانت معان تنقسم إلى معان الشمالية ومعان الجنوبية وكانت لهم معان الشمالية ,وهم في الأصل كانوا قد هاجروا إلى معان من موطن طئ بجزيرة العرب وهو المنطقة الواقعة بين جبلي أجا وسلمى(مدينة حائل حاليا (

ولقد إستعان بهم السلطان الناصر صلاح الدين ومن بعده السلطان المظفر سيف الدين قطز والسلطان الظاهر بيبرس البندقداري في تأمين حدود مصر الشرقية من ناحية سيناء ضد الصليبيين,نظرا لما عرف عنهم من شدة بأسهم في القتال,وأقطعهم السلطان الظاهر بيبرس منطقة شمال سيناء وناحية الصالحية وفاقوس بشرق الدلتا..

وكان منهم أيضا حملة الراية والبوق أو النفير في جيش السلطان المظفر سيف الدين قطز خلال معاركه مع التتار.


حاليا يتواجد معظمهم في محافظة شمال سيناء بمصر وتحديدا في منطقة بالوظة وقاطية والعريش.

وأيضا يتواجد العقيليون في محافظة الشرقية وتحديدا في قرية كفر الحاج عمر التابعة لمركز فاقوس.
ومن العقيليين في محافظة الشرقية أيضا يوجد الفراجوة( آل فرج بن عقيل )ويسكنون بقرية المحمدية التابعة لمركز منيا القمح.

أما في صعيد مصر فمن العقيليين يوجد آل ضبع وآل سليمان وآل فرج في قرية بني فيز وفي القرى الأخرى بدائرة مركز صدفا التابع لمحافظة أسيوط.



الاراضى الحجازيه من 850 سنه صحراء مترامية الاطراف بحر من الرمال لا يستطيع السير فيها الا من يعرفها والا حكم على نفسه بالموت المؤكد .
وقف الفارس ينظر الى املاكه الممتده امامه . كان حزينا فقد الهته الحروب والمنازلات حتى تقدم به العمر ووصل الى الاربعينات دون ان يتزوج وتتغلب عليه الان الرغبه فى توريث ما حققه الى ابن من صلبه . حتى اطفال الاخرين من عائلته لايرى فيهم من هو جدير بأن يرث سيفه . دمعت عيناه وامتطى فرسه وانطلق الى الصحراء المفتوحه واخذ يبثها حزنه .

لم يخلق الله مثل محمد
نبى الهدى قد جاء بالقرأن
صلى عليك الله يا علم الهدى
يا نور العيون يا صفوة الرحمن
اصلى على من قال يارب امتى
طه الذى شرف بنى عدنان
قد خاب عبد لايصلى على النبى
طه الذى قد جاء بالبرهان
من بعد تمجيدى فى جمال محمد
اقرأ لشعرى مربع الاوزان
يقول الفتى رزق الشجيع ابن نايل
جور الليالى حير الانسان
امنت لك يا دهر ورجعت خنتنى
ولا كان حسابى ان الزمن خوان
بتخونى ليه يا دهر تكسرنى فى العضا
خليت دموعى مزقوا الاجفان

الا يا عباد الله يا ميلة الزمن
تاريها الغروره طبعها خوان
ابكى على الفرقه وحيف ما جرى
دمعى سرى بل الاراضى طيفان
على ما جرى يا ويح قلبى لما جرى
يا هلترا اقعد مع الاخوان ؟
ابكى على الايام بعين وجيعة
عدم الخليفه هدنى بمكان
انا الذى قد هدنى البين والنيا
اشكو لربى محتكم منان


كنا برفعه قد خفضنا زماننا
صبحنا اذله والعزيز اتهان
ياما ضحكنا وكان البكا عند غيرنا
واليوم بنبكى وخصمنا فرحان
امنت لك يا دهر ورجعت خنتنى
تاريك يا دهرى المشوم خوان
دنيا اذا اعطت سريع انقلابها
بعد الحلاوه تسقى كاس بمرار
تميل على الامرا و تهدم فراشهم
وتعلى اسافل لم لها برهان
تزهو لمن يزهو وترجع تنطفى
فلا قصور تفضل ولا عمران
دنيا اذا عدلت عروسه مزهزهه
تيجى صبيه جميله راخيه دلال
تميل عالغندور وتهدم منازله
بيت الهفيه عالى البنيان
تميل على الاخين تاخد عزيزهم
وتروح وتترك الخايب الندمان
ان عادت الايام بالفرح والهنا
لاركب على المهره واطوح زان
واخلى بنات البدو ترخى شعورها
واخلى دما اعدائنا طيفان

وادق طبل الفرح قدام بابنا
واقول عطانى مقتدر حنان
استغفر الله العظيم من الخطأ
الهى تعالى خالق الانسان


ظل ساهما الى ان نزلت استار الظلام كانت الرمال ممتده فى كافة الاتجاهات لم يكن خائفا وهو الفارس الذى لا يشق له غبار الى ان اتاه صوت ارعبه . تلفت فى كافة الاتجاهات . سقطت عمامته . حاول لفها وفشل .
جائه الهاتف مرة اخرى يأمره بأن يتجه الى مكه وسوف يتزوج عذراء شريفه . كان الامر شديد الوضوح ولم يكن فيه مجال للشك حيث الصحراء مفتوحه ولا يوجد مجال لاى تردد او صدى صوتى .

. انطلق بفرسه كالسهم الى ديوان ملك القبيله وهو ابن عمه . كان الملك سرحان ملكا عادلا وراجح العقل . حكى له ما حدث معه . استقبله الملك مبتسما بشوشا وبادره قائلا . كونها عذراء فهذا معروف اما شريفه فهى من نسل المصطفى الهادى سمعونا الصلاة على النبى وقد خاب من لم يصلى عليه .


بلغنى الكبر يا ضهرى وحنيت
من الله تقضى المصالح
بكيت عالبلاوى وحنيت
فى بيتى مفيش طفل فالح

بالوج بعينى يمين وشمال
على طفل عندى يلاغينى
جاتنى الليالى سوده وشومال
قادر يا رب تراضينى


سمع ندا من قبل الله
ياخى كل منا وسعيده
يا رزق اصغى على الله
تزوج فى مكه السعيده

امرك لربى المتعال
فى جبال امشى وشريفه
ان كان مرادك تخلف عيال
تزوج بعذرا شريفه

سمع دوله قلب الفتى انسر
بعد ما كان له دمع نازل
عدل مهرته عالبلد سر
رجع البطل للمنازل

كان باكى والدمع سرحان
عالارض دمعه روايه
اقبل الى ديوان سرحان
وشرح عليه الروايه



قاله انا وحدى كنت فى الجبل مريت
ولا معاى احدا حجازى
سمعت صوت والشخص ما ريت
قاللى تزوج من ارض الحجازى

ما الرأى يا ابن عمى
لونى تغير بصاره
منى اتخبلت لف عمى
يا سرحان شوفلى بصاره

قاله انت لا عايز ولا حاجه
اسمع كلامى وصيغه
تستنى لموسم الحج
كلام حلو منى وصيغه

وتقصد باب الرحمن
والصبر تاخده نابينا
والزعل والغلب روحمان
وتسافر تشاهد نبينا


تروح للزياره وترتاح
ماتطلبش ولا اى حاجه
وان كان الدور فيه نجاح
اهى تبقى حجه بحاجه

سمع له الامير صلوا على الزين
اخد الكلام جد فى مكانه
خاليين من الكدب والزين
كلام العرب له مكانه
استنى لموسم الحج
راجل بطل عالى نسابه
عرض على كل من حج
ياخده البطل على حسابه

تمانين فارس الل اطاعوه
قالوا نزور قبر التهامى
المال ليهم دفعه
راجل زين عنده تهامى

وتمم على الامر كله
التوبعى ولد نايل
وعمل عمل فى محله
وكسا رجال الهلايل

خدهم معاه عالخيول
قريب ونزل الحجازى

سلطان على السرج معدول
راجل فتوه حجازى

عندما نزل البلاد
ووصل لمكه السعيده
قال يا عرب بلغنا المراد
وكل منا وسعيده

زار البيت الحرام
وزار الكعبه الشريفه
واقبل لدار السلام
راجل عروضه نضيفه

من زمزم شرب وتروى
هو وجمعة رجاله
سلطان له حيل وقوه
راجل جد عنده رجاله

عندما طلع على عرفات
وطلب من الله التجالى
الناس بمقامه عرفت
وقالوا الزعيم الهلالى

كان ينتظر ان يحدث اى شىء مما قاله الهاتف له . انتهت مناسك الحج واستعدت القافله للرحيل
وبدء حزنه يتصاعد . بدأت طبول القافله فى الهدير لتظهر لباقى القوافل قوة قبائل بنى هلال
وكانت القافله تنتظر اشارة الامير رزق ابن نايل حتى تبدأ المسير الى المدينه . ركب
الكحيله (فرسه) ودار بها حول القافله ثم اعطى اشارة البدء للمسير .

سارت بعض القوافل الاخرى بالقرب من قافله رزق ابن نايل قد تكون صدفه او علها تتلمس
الحمايه 0 ومن يلوم القوافل اذا تلمست الحمايه من قافله بها ثمانون فارس ويأتمرون بأمر قائدهم
المغوار رزق بن نايل. كانت القافله الاقرب اليهم هى قافلة شريف مكه الامير قرضه0 بعد مسيرة
يوم حطوا الرحال للراحه والنوم 0 ظل رزق طوال الليل يدور بالكحيله يحرس القافلتين وتكرر
الوضع فى اليوم التالى 0 لاحظته بنت الامير قرضه وقررت ان تطلب من ابوها ان يكافئه على
مجهوده وحميته فى حراسة القافله وفعلا طلبت من ابوها ان يدعوه هو ورجاله لشرب القهوة فى
مخيمهم ولم يرفض قرضه طلب ابنته وتوجه الى مخيم رزق واستحلفه ان يأتى هو ورجاله ضيوفا
عليه وافق رزق على الدعوه


صلوا على الزين
ورايحين يزوروا نبينا
الى المدينه والطبل بيزن
والصبر واخده نبينا (نايب له)

شريف مكه مع ظروف الفتى
راحل معاة
رايحين يزوروا التهامى
انما المصلحه لرزق هماه

فى نفسه يحاور تهامى

وجت ظروفه فى جنبيه
نصبوا الخيام الحبايب
والعز والفرح جنا بيه
كان رزق شيخ العرايب

كان رزق فارس وغندور
والتمانين جملة رجاله
طايعينه اذ يقعد ولا يزور
عالميمنه و شماله

يقول مدح النبى خدته تجره
احمد حبيب الحبايب
عند جرده بنت تسمى خضره
دايما تتلو فى الكتايب

جالسه و بتقرا ف كتاب
بتفسر حروف الهجايه
بكمال وفقه واداب
رباها نعم الربايه
بصت الاميره بالعين
ام العيون الكحيله
ليها لون موزون بالعين
لقيت رزق عالكحيله

نادت الاصيله اه يا باه
حره وصاحبة امانه
الراجل ده وعربه اللى وياه
تدعيه يشرب قهوة حدانا

شيفاه طول الليل غندور
راكب ظهر الركوبه
وعلى النجع كله بيدور
وعلى جسمه ماحملش ثوبه


راجل فتوه عربان
غندور فيه الكفايه
ولا يوم فيه العار بان
غندور نعم الربايه

قال جرده حقه وجب عليه
ده راجل اتانا المنازل
اجودله بروحى وعنيه
ده شرف جميع المنازل

طلع جرده ماشى عا القدمين
راحله لحد الخيامى
سلم عليه ملا منه العين
لقاه يغيظ اللئام



قاله اتفضل انت وعربك
يابطل يا قرة عيونى
امير ياللى وافى حسبك
فى منزلى شرفونى

اشرب قهوة العروبه
ياشريف معنى وجاره
راجل مابه عجوبه
انا فى النبى مستجارك

قام رزق لبى الطلب وراح
فرشلهم فرشه ملوكى

صفيوا الحبايب وهبهب الراح
اماره يفوق الملوكى

بعد العزومه وبعد الواجبات
قاله الشريف مرحبا يا هلالى
وقلوب الاحبه ودت وجابت
وربى اراد انفتح السؤالى

ربى اراد انفتح السؤال
بقت التقيله خفيفه
قاله يا رزق عندكش عيال
ليه ما جبتش معاك الخليفه ؟
يابو العميمه النظيفه
بيقوله جرده
عندكش عيال يا شيخ العرب
ماعندكش خليفه ؟
رد ابن نايل وقاله

عند ربنا كل حاجه
كتر الكلام زى قله
انا لزمانى زواجه

عشان الخليفه والاولاد
علشان اعمر ديارى
يا شريف تعبان الفؤاد
والبحر ما يطفى نارى

قاله الشريف ده انت نفدوك يا بطل بالعين دى
ياللى بيكم نارت الاراضى
الطلب ده موجود عندى
لو الله يكون عليك راضى

عندى بنيه صبيه
الريق يبرى السماتى (يبرىء من السم)
تحاكى النجمه البدريه
تفوق القمر فى السماتى

على الله ترضى يا امير
قبلك كتير خطبوها
وانا صابر على الغلب وامير
وانا الفتوه ابوها

اسأل امها مرضياش
ما قبلتش ابدا راجل
والامر لله مبدناش
خلت قلوبنا مراجل



طلب رزق من الامير قرضه ان يوسط امها فى الطلب ولكن الامير قرضه اخبره بأستحالة ذلك بسبب كثرة رفضها حتى اعتقدت امها بأنها مريضه 0 تشبث رزق بطلبه فنزل الامير قرضه عند رغبته وذهب الى زوجته فى الخيام وقال لها ماحدث من رزق 0 سألته عنه كثيرا وجاوبها تمنت ان توافق ابنتها عليه ولم لا وهو فارس بنى هلال ولكن هل توافق ام ترفضه كما رفضت الاخرين 0 ذهبت الام وهى / طيبه بنت منصور من نسل هاشم الى ابنتها وهى لاتأمل الكثير قالت لها يا ابنتى جائك فارس العرب يخطبك يريد الزواج منك فهل تفعلى بى كما فعلتى بى من قبل حتى اصبحت مكلمة القبائل 0 فوجئت طيبه بموافقة ابنتها 0 حقا لقد وافقت اخيرا 0 لم تصدق الام نفسها وخرجت مسرعه لتزف خبر الموافقه للامير قرضه 0 وصلوا على الزين 0





قاله رزق اسأل امها تبلغها عنى
يا بطل يمكن هى اللى جت منالى
وهى اللى قرة عينى
وهى اللى ام عيالى

دخل الشريف صلوا على الزين
الى الوالده فى الحجايب
ده راجل خالى من الكدب والزين
للست وفضل يجاوب

امها طيبه بنت منصور
اصيله ومن نسل هاشم
مع ان رزق فى الغيط منثور
شيفاه خضره كما الورد هاشم

سألتها الوالده عنه
يا ست ونخبروكى
شوفى الراجل ده وبصى لعينه
قال ليه جاى يخطبوكى

جاى يخطبك اسد هلال
يا عايقه فى صباكى
ما ردك فى الاقوال
يا خضره الاله عطاكى

كان الجواب قالت
بالقول ده راق دمى
انا اعرف اللى يصيبى
ان الاوان يا امى اهو ده اللى نصيبى





قالت طيبه . بس ده مسن
يا خضره وانتى غضه
قالت حا يكون احن من
امى اللى ربت و قرضه

هذا نصيبى اللى رضيت بيه
هو اللى ابو عيالى
وعياله(شيفاه) حلو يرد الجواب ونبيه
وحتى عيون الامير رعيالى (مرقبانى)

قامت امها طلعت تقول
يا قرضه زاين ديوانك
يا فتوه يا امير يا معقول
العز والفرح جالك

بصت عليه وراعتله
القسمه عرفت تجيبك
فرحت امها زغرتتله
يا قرضه بشر نسيبك

فرحوا العرايب ما شالتهم الارض
وارتاح قلب الهلالى
شىء كان بعيد اصبح خلاص وعد
اراد بيه مولى الموالى




اخيرا تحقق ما قاله الهاتف لرزق كانت فرحته كبيره بموافقه خضره على طلبه للزواج منها وفرحت كذلك كل قوافل القبائل المرافقه لهم 0 كتبوا الكتاب وارتبطوا واكملوا طريقهم لزيارة قبر الرسول فى المدينه 0 بعد ذلك عادوا الى مكه بلد الشريف قرضه وبعد عدة ايام من وجودهم بمكه خرج موكب الزفاف الكبير 0 كانت خضره تركب فى هودج شديد الفخامه مصنوع من الابانوس ومرصع بالمرجان والياقوت موضوع على جمل وكأنه غزال فى سرعته ونباهته0 زاد على ذلك جمال الاميره خضره 0 كان جمالها فى جمال الحور وكان موكبها مهيبا 0 عندما وصلوا لنجوع الهلايل دقت طبول قبائل جعفر ونايل لتعلن وصولها بعروس رزق والتى انتظروها كثيرا خرجت جموع القبائل لتقابل وتهنىء وانتهت احزانهم بزواج زعيمهم رزق بن نايل

كتبوا كتاب الصبيه
وعم السرور فى المدينه
واجتمعوا هو وهيه
زاروا المكمل نبينا

زاروا المدينه مع البيت
وتطهر القلب خالص
وتم الصفا مع البت
اراد ربنا بقلب خالص

ادوا جميع النسوكات
وقصدوا بلادهم فراحى
فرحت جميع الولادات
هم .. وعن الكل راحا

اخدوا الاصيله على جملها
فى هودج يسوى ملايين وزياده
سابله لتام الادب فوق جمالها
تحاكى حور الجنان او زياده

جروا الجمل وهيه كالغزلان
وصلوا نجوع الهلايل
الكل قلبه فرحان
اولاد جعفر ونايل

ضرب طبلهم يوم ما وصل
لبعض زفوا التهانى
بالفرح والعز اوصال
و زاد الصفا والمعانى

دخل بيها الفتى على راح

صلاة النبى تاج لينا
والغلب ويا الزعل راح
وفرحت جميع المدينه



شهرين وحملت الشريفه 0 مرت الشهور سريعا وولدت بنت اسماها رزق - شيحه - تيمنا بوشاح امها التى كانت تضعه دائما 0 رضى رزق بما قسمه الله له بالرغم انه كان يتمنى ان تلد له خضره ولد زكر يرث سيفه وقال فى نفسه يأتى الزكور بعد الاناث فصبرا جميلا وانتظر الحمل الثانى لخضره ولكنه لم يحدث . مرت ثلاث سنوات ثم خمس سنوات ثم عشر سنوات ولم تحمل خضره 0 وصل ابن نايل لسن الخمسين ونفذ صبره من الانتظار


قعدت فى ديوان الامير شهرين
جميله ونعم الوجاهه
ليها الاصيله اصل عال وشهرين(شهره)
ربى المهيمن عطاها

محجوبه فى عالى البنايه
عالكتف محلا الوشيحه
روزق البطل ب بنيه
م الفرح سماها شيحه

قال البطل الحمد لله
عجبنى امر الولادى
رضيت بما قسم الله

الانثى وراها الولادى

بعد كده فضلوا صابرين
ربى المهيمن عطانى
مع بعض الاتنين صابرين
سنتين محملتش تانى

برضه تمت تلات سنوات
اربعه ماجتش خليفه
خمسه ليها دموع سنوات
حمول البلا مش خفيفه

لما تمت عشر سنين
ما وضعتش اولاد تانى
لا بنات ولا بنين
ودى حكمة اللى نشانى

فى ده اليوم طالع يمر عالمال
عطاه له اله البرايه
شاف المال عقله الذكى مال
شافه كتير ملهوش نهايه

لقى المال شمال ويمين
خيول ويا جمال
قال يامال بعدى يورثك مين
اه يا عدم العيال

سقانى البين كاس دايب خليفه ( كأس به خل )

البكا جرح الفؤاد على عدم الخليفه

انا كبرت وقصر باعى
والبين خلف الميعادى
يا مال مين يورثك بعدى
اخاف يورثوك الاعادى

يا هلترى مين يورث المال
مدام ممعييش خليفه
فوضت امرى الى المال (المولى)
سقانى البين كاس الخليفه




فى صباح يوم العيد تجتمع القبائل فى ديوان الملك سرحان للتهنئه والمجالسه بفرحة العيد ولكن تلك الفرحه كانت مختلفه عند رزق .عندما وصل الامير رزق الى ديوان الملك سرحان كان مكتظا بشيوخ قبائل جعفر و هلال و سليم و زغبه ورياح و زحله جاؤا يهنئوا بالعيد كما كانت العاده 0 وقف الجميع عندما اقبل عليهم الزعيم وافسحوا له المكان واجلسوه بالقرب من ابن عمه الملك سرحان 0 عندما رأى رزق ولدين للملك سرحان انفجرت احزانه فهب واقفا وخرج من الديوان دون استئذان وسط دهشة الجميع لعدم فهمهم لمعاناته 0 ذهب الى البيت وطرق الباب ففتحت له خضره 0 احست بحزنه فسألته عما يحزنه 0 قال لها اخيرا ما بقلبه قال لها انتى سبب حزنى 0 تزوجتك لتملاى البيت اولاد لكنك انجبتى شيحه وتوقفتى بعدها عن الانجاب ولا يطاوعنى قلبى على طلاقك وجز على اسنانه حتى لا يغضبها اكثر من ذلك 0 قالت له كلامك معقول يا امير ارشدنى الاولاد بيتزرعوا فين وانا اروح اجيب التقاوى 0 اتقى الله يا رزق ولا داعى لهذا الكلام فأنه يجرك الى المعصيه 0 بات رزق ليلته وفى الصباح الباكر خرج لصيد الغزلان


الا مؤاتى عيد رمضان
ولبس هدومه الجريدى
ولبس هدومه السلطان
ودخل ديوان الدريدى

يعنى الامير رزق غير ملابيس
ابو شال على القرن مايل
وركب كحيله على الكرابيس
ودخل ديوان ملك الهلايل

ولا عايمه الا ما ترسى
فارس وفى اللبس خايل
وكل من جالس على كرسى
وقف احترام لابن نايل

شبعان من المر وهواليه
مين يقول جاهل كا راسى
ودخل لمجمع اهاليه
عربان فوق الكراسى

وقفوا العرب عالقدمين
وحياة كتاب الدلايل(دلائل الخيرات)
للامير باسوا الايدين
وعيدوا على ولد نايل

وقفوله كبار وصغار
للبطل ابو باع طايل
امرا و نعم الامار
امير الامرا رزق بن نايل




وجاب كرسى جلسه جنبيه
سرحان له مخ راوى
فرسانه ورجاله حواليه
ودارت العبيد بالقهاوى

حاضرين شمال ويمين
حمول البلا مش خفيفه
يلقى سرحان فى طوله ولدين
وهو عايش قليل الخليفه

لما رزق التفت بعيناه
راجل وله وجه نادى
بيقول يا بين قصرت باعيناه
اه من عدم الولادى

ولاد سرحان عالفراشات
اللى اتبلا ماتلوماشى
رزق عقله من مخه قد شت
ترك قهوته وقام ماشى

راوح على البيت فى غضب
وطرق الباب بيمينه
عقله مع الغضب انجذب
كأنه شايف يومينه


كان البطل وصل الخمسين
وغير شيحه معندهوشى
وخليفته فى البيت ستين
لكن ان بكى متلوموشى



طرق الباب الفتى بيداه
ما فاضل فى جسمه شريفه
ليها خد موزون وندا
فتحتله خضره الشريفه

قالتله اراك باكى وزعلان
يوم العيد ليه يابن نايل
اخبرنى يا اجدع انسان
يا حامى جيوش الهلايل

قالها سبب البلاوى وبكايا هو انتى
انا جايبك اميره وقرة عيونى
وشاورت قلبى بطلاقك ما هونتى
بس خليتى العرب عايرونى

انا جايبك تعمرى البيت
حره ظريفة معانى
من نهار ما وضعتى بالبت
ليه مجبتيش عيال تانى

ده انا كان املى فى العشر سنين
ماعرفش عدد ولادى
وقرط ع الناب وسنين
لا تحكى فى ديه ولا دى

قالتله الشريفه كلامك حلو وفى الموضوع
انما استمع وخليك معايا
عارف اى غيط فيه العيال مزروع
اروح اقطفلك تقاوى




انهوا سوق بيبيع اولاد
اوعى مع ربك تقاوى
كلامك ده جرح الفؤاد
قوللى على مطرح اجيب التقاوى

عقلى ذهب من الدماغ شال
ده انا صابره لحكم سيدى
معطنيش ربى عيال
يعنى حاخلق عيال بأيدى؟

يا رزق الصبر جميل
يا بو العروض النضيفه
وحياة طه الضمين
لربك يجود بالخليفه



صلاتى وتسليمى عليك يا نبى
نبى الله نوره من القبر ناير
نبى الهدى لولاه لم نعرف الهدى
قطع العدا بالمرهفات البواتر
قد خاب عبد لايصلى على النبى
فهو الحبيب والرسول المهاجر
بعد تمجيدى فى جمال محمد
اقرأ لاشعارى اذا كنت شاطر
غنى الفتى رزق الشجيع ابن نايل
ايامى والدنيا لها حكم جائر
اشكو لمن رفع السماء بلا عمد
الهى تعالى حى حنان قادر
على ماجرالى يا ويح قلبى لما جرى
وانا حزين عليه وصابر
اوقات تجينى ايام بيضا مزخرفه

واوقات اشوف ايام كالليل عاكر
واوقات ناكل الزاد بسرورمع هنا
واوقات اعوف الزاد و لو كان حاضر
امرى لمن انشا الخلايق من عدم
الهى تعالى للسموات فاطر
استغفر الله العظيم من الخطأ
الهى تعالى حق للذنب غافر

صبح الصباح و صبح يصيد غزلان
ولكن دمعته للجبالى
بيقول يا بين ليه خبلت غزلان
ومسك وسيع الجبالى



لما خلا المنزل وفضلت خضره
كلامه فى المسا كان اذاها
قالت يا ربى ان كان فيها زيت وخضره
ما تحرم سيده من عطاها

يا مولاى انت بيا علمان
ندر عليه اكسى العرايا

ان رست مركبى عا المان (الميناء)
لاقيم للرب رايه

ان عطانى الخلف ورأيت
حاجه تعمر ديارى
لو اشوف طفل يمر فى البيت
عشان رزق ويطفى نارى

بتبكى وليها دمع سرحان
العايقه فى صباها
سمعتها شمه مرات سرحان
كان السكن فى الوجاهه

نزلت شمه من باب الخلف
وجاتها الى المنازل
كلامهم مفيهوش خلف
تجدها الدمع نازل

ما ابكاكى يا نور العين
ابيعلك الملك والرهونى
يا قنديل فى القصر والعين
اللى اغضبك وريهونى



ده انتى ليكى على الخد شمه (شامه)
اشرحى عليه الروايه
قالتلها رزق يا شمه
بهدلنى وشحطط نيايا

بيعايرنى بالعيال
طب اعمل ايه لحكم سيدى
انا ببص يمين وشمال
يعنى اخلق عيال بأيدى

قلتلها شمه ماتبكيش
يا اصيله لمى غطاكى
كلام جد منوش تبكيش
ان راد ربك عطاكى

قومى يا اصيله انزلى معاى
نتفسحوا فى الجناين
بدال البكا وفيض دموعاى
لربما تصيبك جناين (خائفه عليها من الجنون)

شدولها على جملها
لابسه زمرد يلالى
لثام الادب فوق جمالها
حليلة الزعيم الهلالى




الواحه المسماه ببركة الطير

كانت هناك خارج حدود القبيله يذهب اليها النساء فى يوم محدد من العام يحسبون له ويعرفونه كان بالنسبه لهم يوما مباركا ابواب العرش فيه مفتوحه يتقبل الله فيه دعائهم بالانجاب وليس هذا فقط كان هذا اليوم من العام هو اليوم الوحيد الذى تنزل فيه طيور عابره لتشرب فى وسط تلك الصحراء الشاسعه فكانت كل واحده تتمنى على الله ان يرزقها بمولود بصفات الطائر الذى يعجبها . عرفت الجاريه سعيده بأمر تلك البركه من الاخرين وظلت سنوات تتوسل لسيدتها خضره الشريفه ان تجرب الذهاب الى بركة الطير ولكنها رفضت واستنكرت ان تستعين بتلك الامور وان الله لو اراد لاعطاها . وكانت ارادة الله ان يكون هذا اليوم الذى خرجت فيه مع شمه زوجة الملك سرحان هو يوم بركة الطير واستدرجتها شمه للذهاب بها الى هناك لعلمها برفضها التام لهذا الامر

اتخذت شمه طريق الجناين وتجمعت معهم اثناء السير باقى النساء الذاهبات لبركة الطير . ثلاثون جملا يحملون اجمل نساء بنى هلال فى طريقهم الى خارج حدود القبيله وان كانوا يسيرون الان فى جناين القبيله وداخل حدودها وتظن خضره الشريفه ان شمه تقصد الترفيه عنها بالسير بها فى الجناين . خرجوا من حدود القبيله واصبحوا على مشارف بركة الطير . ووصلت بوصولهم بعض الطيور . كانت تحوم فى السماء . هبط السرب الذى وصل اولا كان طائرا ابيض رائع الجمال يسير ورائه وعن يمينه طيور بيضاء كثيره . تفحصته خضره وانبهرت بجماله وعظمته . بادرتها شمه بأن تتمنى من الله ان يرزقها بولد مثله لكنها رفضت . احست فيه خضره بالعظمه ولم تشعر فيه بالقوه وقالت ولد على شاكلته لايستطيع حمايتى لو هاجمنى احد . تمنت عليه شمه زوجة الملك سرحان .


معاها جاريه كانت حره
اصل كل من هو سعيده
ملبساها ثياب حره
جاريه تسمى سعيده

ذهبوا الاتنين مع النساوين
وصلوا وسيع الجناين
الصبايا اللى طلعوا تلاتين
حلوين يحاكوا حور الجناين

وصلوا لغاية البساتين
غادروا النجع والمنازل
بصوا الاعناب طالعه والتين
والطير عالبركه نازل

نازله الطير عجب والوان
يشربوا يوروا العجايب
بصت خضره على كل ماكان
م الطير لقت العجايب

شويه جه طير ابيض اللون
البنات قالوا يا ساتر
القلب مشروح وممنون
تقول ملك ووراه العساكر

الطير كتير اللى وراه
يا سلام على ظرف باله
الحلو موزون ووراه

وتابع وماسك شماله


البنات منه خدوا البال
قلولها يا محلا النظامى
ياخضره قلبنا للطير ده مال
يانسل الحبيب التهامى

تمنى يا نسل النبى الزين
يا شريفه لمى غطاكى

يا خاليه من الكدب والزين
ان اراد ربك عطاكى

قالت يابنات متلوموناش
انا عقلى منى هجينى (سوف اجن)
على الابيض مستمناش
ده ميحمنيش فوق هجينى

تمنت عليه مرات سرحان
مرات الملك فى ديوانه
قلبها على الطير صار حن
عجبها كماله والوانه

قالت الاصيله ارجوك يا مولاى
شمه بنت زيد بن حارث
يامولاى ارجوك ضناى يكون
غلام للشرق وارث

اعطنى غلام وارث المحلات
ويطلع غالب نديده
كمثل الطير فى لونه ومحلاه
والحل والربط بأيده





هبط بعده طائر احمر اللون قوى مختال عدوانى فى تصرفاته لم تتمنى عليه خضره الشريفه ولكن تمنت عليه زوجة غانم بعد قليل هبط طائر اخضر رائع الجمال فلم تتمنى عليه خضره هو الاخر وكان الوقت يمضى وتوشك الرحله الى بركة الطير ان تنتهى . تمنت عليه زوجة قاضى بنى هلال . اصاب القلق سعيده جارية خضره لانها لم ترزق بمولود مثل سيدتها وكانت تأمل ان تتمنى على احد الطيور ولكنها كانت تنتظر ان تتمنى سيدتها اولا
. بعد قليل هبط زوج من الطيور السوداء تراهم قائد وتابعه . بنزولهم الى البركه طارت كل الطيور الاخرى تاركه لهم البركه . طلبت شمه منها ان تتمنى على هذا الطائر القوى الذى فرت من امامه كل الطيور وقبل ان ترد عاد الطير الاحمر لقتال الطير الاسود .




اصابت الجميع حاله من الانتباه لمشاهده المعركه المرتقبه حتى الطيور عادت مره اخرى لمشاهده ما سوف يحدث . لم يكن الطائر الاسود يسعى للقتال مما اعطى فرصه للطائر الاحمر لمهاجمته من الخلف . استوعب الطائر الاسود ضربة الغدر واعتدل للمواجهه وضرب الطائر الاحمر بجناحه فأوقعه ارضا . كانت خضره منبهره بقوة وشجاعة الطير الاسود وكذلك كل النساء الموجودات الذين زادت حماستهم فأخذوا يشجعون الطائر الاسود . قام الطائر الاحمر ليعاود الهجوم فضربه الاسود بجناحه ثم نقره نقره لم يقم بعدها . زغردت خضره للطائر الاسود من فرط الاعجاب وارادت ان تتمنى عليه ولكنها كانت خائفه ان يرزقها الله بمولود اسود وهى البيضاء وزوجها كذلك خافت ان يتهمونها فى شرفها ولكن حماسها للطير الاسود غلبها فتمنت من الله ان يرزقها بغلام على شاكلته فى القوه والجرأه والشجاعه . كان باب العرش مفتوح فاستجيب لدعائها .
استعد الموكب للعوده فنادت عليها جاريتها سعيده وقالت لها انتظرينى قليلا يا شريفه انتى تعرفين ما اعانى من قلة الانجاب فهل كونى عبده لا يعطينى الحق فى ان اتمنى على الله . نظرت الى السماء رافعة يدها مبتهله الى الله ان يرزقها بغلام على شاكلة الطير الاسود الثانى ويكون عبد ابن الشريفه واستجيب لدعائها ايضا . عاد الموكب الى الديار وعادت كل الى بيتها .


بعده نزل طير احمر
غنوا البنات الهوانم
عالبركه نزل ولاح مر
تمنت عليه مرات غانم

وبعده نزل طير اخضر
حاجه عجب م العجايب
عالبركه بيتمختر
غنوا بنات العرايب

عالاخضر تمنت مرات قاضى بنى هلال
قالت يامولاى زيح الشدايد
اخضر ولونه حلو بكمال
تمنت عليه مرات فايد

وفضلوا الصبايا اللى فاضلين
خضره ليها دمع نازل
تتلفت شمال ويمين

ضايقه عليها المنازل

شويه ونزلوا جوز طيور
فيهم العجب يا حبيبى
من وجههم ساطع النور
فيهم فرد اسمر زبيبى

والتانى جنبه بعكار
زايد لونه معانى
لما حط الطير وداك طار
ما خلوا عالبركه تانى


عندما نزلوا الاتنين
السمر قاموا طيروها
ما عرفوا الطير ده راح فين
طاروا ولا يوردوها

قالت الصبيه مرات سرحان
تمنى يا نسل طه نبينا
ليكى شعر عالكتف صار حن
والصبر وخداه نابينا

شوفى الطير نظروه الطيور
ولت ما فضلش واصل
باين على وجهه النور
فيه الفوايد وحاضر

الطير الاحمر بعد ما طار
عاود يشرب عالبركه تانى
عمل نفسه صاحب مقدار
انظر وشوف المعانى

الاسود قام اتلاطم معاه
عالبركه منعوا الشرابى

يا سلام والطير جمعاه
ونزلوا ف بعض ضرابى

نزلوا فى بعض ضرب الاثنين
بمنقارهم والجناح
والبنات بصين بالعين
على كل ناحيه جناحى




اتعدله الاسمر لما دار
زاد البلا والمراضى
وضرب الاحمر بمنقار
الاحمر وقع عالاراضى


طلت عليه الشريفه وقالت له
صلاة النبى يا قرة عيونى
انشرح فؤادها زغرتتله
وقالت يا صبايا جمله اسمعونى

ياسلام يااسمر ياللى الرب حلاك
فى جسم البلا كل مونى (كل جسدى من البلاء)
بالله لو اسمر قوى برضه اتمناك
حتى ان لامونى يلومونى

انا خايفه اتمناك
يا اهل الطريقه انجدونى
لكن لاعتبر ده ولا ذاك
والله خايفه ليتهمونى

لكن امرى مفوض لربى
واللى انكتب طبعه سابق
والعز والفرح ربى
كان سعدى فى الغيب سابق

تمنت وطلبت من الله
يعطيها غلام صالح
يعمر لرزق وراه
ويقضى جميع المصالح



طلبت الحره من الله
العز والفخر نازل
يعطيه غلام وراه
يعمر جميع المنازل


اتمنيت عليك يا طير
خليفه لرزق ابن نايل
لو الرزق مقسوم ما يطير
يا رب انصرنى وسط الهلايل

ويكون قلبه للعلم مشروح
ويصلى عالبدر طه
كان يومها باب العرش مفتوح
استجاب الاله دعاها

رجعوا الصبايا على البلد فى سرور
كملان ظرف وسعيده
جمالهم وصار الركب مجرور
بصت وراهم سعيده

قالت يا ستى مهلا دقيقتين
ناسيه اللى حصل فى المعانى
تمنيتى من الله يا قرة العين
اشمعنى انا عادمه التمانى

طلبت الجاريه من الله
حمولى تقال مش خفيفه
اعطنى غلام مثل اللى وراه
يطلع خادم ابن الشريفه

وصلت الشريفه للبيت كان رزق لسه مجاش من الصيد . ابدلت ثيابها واطلقت المسك وتزينت و ازدادت جمالا فوق جمالها و انتظرت عودة زوجها . عندما حضر زوجها احتضنته وطيبت خاطره وطلبت منه الرضاء بما قسم الله . انفتح قلب زوجها لها وهدأت خواطره ونال حليلته وشاء ربك ان تحمل منه فى التو كما حملت كل النساء الذين كانوا معها فى بركة الطير .






تمنوا ورجعوا على سرور
وصلوا البلد والديار
صلوا على طه كامل النور
وصلوا لمكان الاماره

كل عذرا دخلت ديارها
استعدت ليوم الفراح

الفرح والعز كارها
والهم عا لقلب راح

وصلت و كان رزق فى الصيد
جميله ولها لون خايل
قلبها غير ربه ما قاصد
حليلة زعيم الهلايل

قلعت هدومها القدام
ولبست ثيابها النظيفه
زوجها غندور ومقدام
و رخت الدلال الشريفه

طلقت المسك والراح
وجرت الكحله فى العيونى
انشرح صدرها والزعل راح
يا ال الطريقه انجدونى

ليها نهود عالصدر بارزين
رمان رما عالزرايب
موزونه شمال ويمين
فى الظرف تجد العجايب




شويه رزق اتى من الصيد
وجدها اخر جمالى
على وجه الكريم قاصد
فتحتله قلبها جمالى

عندما دخل على الباب
بالحضن خدت الهلالى
وقالتله ياعز الاحباب

اسأل مولى الموالى

ماتزعلش يا نور عنيه
ان كان لنا شىء قاعد
ده وعد عليك وعليه
والفخر والعز قاعد

قلب البطل نحوها مال
كل عقده ليها حلاله
خدها على الفرش ومال
من السيده طلب حلاله

نال وطالها فى الراح
حره لمه غطاها
وطالقه المسك والراح
وتوسلت بالبدر طه

قامت اغتسلت وصلت على الزين
الحره كالقمر ضياها
مضت بعد ذلك بشهرين
عادة النسا ماجياها



من الايام اتمضوا شهرين
وحياة كتاب الدلايل
صابره على ما اراد الكريم
وقاعده فى عرب الهلايل

تالت شهر لما سمع رزق
فارس عمامته نضيفه

قال ربى اهو جاد بالرزق
حا يبقى لى يا ناس خليفه

الرابع اتوسلت بالنبى يعقوب
حره وتقرا المعانى
قالت صبر على المكتوب
وبعد العمى شاف تانى

خامس شهر لما سمعت الناس
حست جميع العذارى
وعرفوا دكوره واناث
ووصل الخبر للاداره

ساتت شهر ايه جرى لرزق
فى قلبه الفرح شىء هايل
قال لو ربنا جاد بالرزق
لاعمل فرح فى الهلايل

لاعمل فرح وتختروان
له زكر فى الكون وايه
واكسى جميع العربان
وتغنى كل الولايا





سابع شهر حلف رزق
حياة المشرف نبينا
لو ربنا تمم الرزق
لاكسى عموم المدينه

واتعطل النجع كله
بحمل خضره الشريفه
كل مانهو فرح فى محله
حره وجميله ونضيفه

تامن شهر قربوا المواعيد
كتر الكلام واللى قايل
وقال رزق يومنا ديتى عيد
النور يقيد فى القبايل

تاسع شهر وضعوا البنات
امات الخدود الرهيفه
وضعوا جميعهم ولدات

ووراهم ولدت الشريفه

ووراهم وضعت خضره
وحياة اللى بلده بعيده
وتنسب لابو عمه خضره
وورا خضره وضعت سعيده

لما وضعت بنت سنار(سعيده)
مع بنات الهلايل
فرحوا كبيرهم مع صغار
للتوبعى ولد نايل

تمت تاسع شهر عددا
ووضعت غلام الاصيله
سبحانه من صور الرحمن
ولد نسل صاحب الوسيله

جابت ولد اسمر اللون
هنتها امرد وشايب
فرحتلها جمعة القوم
حاضر عرب ويا غايب

بلغ الخبر للعبد نجاح (زوج سعيده وعبد رزق)
لله الكريم بسط ايده
قال الدور مع الكل نجح
وراح يودى البشاره لسيده

دخل العوبيد على الجمع بيدوس
ليالى الهنا تلف تيجى
من على راس البطل خطف الطربوش
وقاله هات البشاره ياسيدى

وكأن العبد نجاح قد اختطف عقل رزق مع عمامته فقد صدمت الفرحه رزق لمعرفته ان العبد لم يكن ليجرؤ على خطف عمامته لو كانت المولوده انثى . اذن فقد انجبت خضره وارث لماله ولسيفه . اخيرا اكرمه الله بولد . يكاد عقله يطير من الفرح . اعطى البشاره للعبد نجاح ثمانين جملا ووزع الهدايا على كافة الموجودين ولم يكن يستطيع ان يرى ولده الا فى يوم السبوع لتسميته فى الديوان كما كانت عادات بنى هلال . فى طريق عودة العبد مر امام اسطبلات الخيل لسقايتها فوجد فرسة رزق قد انجبت انثى وهذا حدث سعيد اخر فقد كانت اناث الخيل هى المفضله والاغلى سعرا وتقاس قيمة الفارس بالفرسه التى يمتطيها . جرى سريعا الى رزق وبشره بالبشاره الثانيه فأعطاه عشرة جمال اخرين .




وقف رزق على القدمين
كان العقل منه هجينه
قال انا عربى اصلى قديمين
بشارة الغلام ثمانين هجينه

ثمانين جمل من مالى الخاص
هديه لعبدى بشاره
كله هدايا دهب خاص
عطى الرجال الاماره

طلع العبد مبسوط منه
حاجه عجب من عجايب
قال سيدى يسلم يمنه
م الفرح راح يسقى الركايب

اقبل على اسطبل الخيل
راحت الليالى الكحيله

بيبص وهو داخيل
لقى فرسة رزق وضعت كحيله

عاود تانى يجرى عالديوان
ليالى الهنا تلف وتيجى
يا عرب يا سيد العربان
كمان بشاره يا سيدى

اعلم الدنيا معاك جات
كلام جد لم فيه نكوره
الخيل وضعت نتايات
والنساء وضعت زكوره



قال ابن نايل وبشرة الكحيله عشر جمال
يبقوا تسعين جمل من مالى
لنجاح والقلب له مال
فرحه لى ربى عطانى

فرح ودبح الوله وليمات
كناها لاربع قبايل
عزم البلد واللمومات
زغبه ودريد وهلايل

كفى جميع اللى موجود
مفيش صغير ولا كبير
المكان فى الجمع موجود
وبذل عليه جهده الامير

وهنته القوم كله
مبارك منعت الوارث(ان يرثك غير ابنك)
اتعمل عمل فى محله
فرحتله العرب فى المجالس

سمعوا اتنين بيقولوا بركات

وحياة كتاب الدلايل
العرب قالوا سموه بركات
بركات رزق بن نايل

اتنين تانى قالوا سلامات
وحياة عروس القيامه
قالوا كمان سموه سلامات
سلامات يعنى سلامه

فات من قال الخير بيزيد
شوايل تسابق شوايل
قالوا نسميه ابو زيد
خلوفة القرم ابن نايل(البطل)




العاده يوم السبوع يوم الفرح ويسموا الغلام

يجيبوه فى جمع الهلايل
وتحضر كبارهم وتهدى كلام
اولاد جعفر ونايل

جابوا الاوله ابن سرحان
فى الجمع وسط الرجال
وابوه موجود و فرحان
فرحتله يمين وشمال

كشف وجه ابنه بيده
عند التسمى بحاله
عالى نسب ابوه وجده
كل العرب فارحاله

لقى وجهه جميل وحسن
حلو وكما كرم طارح
قاله يابنى سميتك حسن
وان عشت ترث المطارح

ماسكله رزق الفين دينار
عطاهم لابن الدريدى
وكل الرجال الموجودين جار
عطوله تحيه الدريدى

روحوا الغلام فرحان
وسماه حسن يا حبايب

كان رزق يغنى دون ان يشعر من شدة الفرح . صاح على العبد نجاح وامره ان يذهب لاحضار وليده الى الديوان لتسميته ولكى يراه جمعة القوم وكان اخوه عسقل ضمن الموجودين يدارى حزنه بعد ان فقد فرصة ميراث اخيه بوصول هذا الطفل الذكر وكان عسقل اخو رزق من الاب . انطلق نجاح فى زفه كبيره لاحضار طفل الامير رزق ولم يكن رزق قد عرف بعد ان طفله اسود .




قال افرحولى يا اهل بلدى
انا عطانى حنان قادر
طير يا نجاح ااتى بولدى
اسميه والجمع حاضر

طلع نجاح يجرى على البيت
عبد وعروضه نضيفه
تغنى وراه الحرمه والبت
قال هاتى الولد يا شريفه

هاتى الولد علشان يسموه
ابن البطل مش لقوطه(لقيط)
موجود فى الجمع ابوه
وعمامه يدوا نقوطه

قالت الشريفه ملزماش
ياخدوا الغلام من يدانا
ليه من هنا ميتسماش ؟
السبر ده مفيش حدانا

قالولها الصبايا اللى قاعدين
اديه الولد يا شريفه
ده عندنا شمال ويمين
حره وعروضك نضيفه

ده عندنا حجر محطوط
يسموا الغلام فى المجالس

يا اميره ده تانى مشروط
ده امر عالنجع خالص






قال افرحولى يا اهل بلدى
انا عطانى حنان قادر
طير يا نجاح ااتى بولدى
اسميه والجمع حاضر

طلع نجاح يجرى على البيت
عبد وعروضه نضيفه
تغنى وراه الحرمه والبت
قال هاتى الولد يا شريفه

هاتى الولد علشان يسموه
ابن البطل مش لقوطه(لقيط)
موجود فى الجمع ابوه
وعمامه يدوا نقوطه

قالت الشريفه ملزماش
ياخدوا الغلام من يدانا
ليه من هنا ميتسماش ؟
السبر ده مفيش حدانا

قالولها الصبايا اللى قاعدين
اديه الولد يا شريفه
ده عندنا شمال ويمين
حره وعروضك نضيفه

ده عندنا حجر محطوط
يسموا الغلام فى المجالس

يا اميره ده تانى مشروط
ده امر عالنجع خالص






غصب عنها خده نجاح بيداه
وراح فى جمع الهلايل
شوف بس لما راد مولاه

موجود عسقل ولد نايل

دلا الغلام قدام سرحان
وجد اللون اسمر زبيبى
بقى قلبه على طول فرحان
قال صلاة النبى يا حبيبى

افرح يا رزق الرب عطاك
تواك ما تسود القبايل
لا قبلك ده ولا داك
يا غندور نجع الهلايل

رماله الملك اربع تلاف
لابن رزق عالصوانى
فى العز والفرح وخلاف
للواد زايد معانى

العبد مسكه ودار بيه
عالعرب اللى قاعدين
وكل منه مد اياديه
بنصيبه يا قارئين

دلاه قدام غانم بن ماجد بن حميار
غانم كشف لثامه
وطير النيا فى وجهه حميار
وكان القاضى فايد موجود امامه




كشف لثامه وبصوا على اللون

وقالوا عشنا ورأينا العجايب
سبحانه الكريم عمر الكون
ولكن دى نادره من الغرايب

الاتنين مالوا على بعض
القاضى جنبيه غانم
قريب ماكنش على بعد
قاله شوف زينة الهوانم

جايبه الولد عبد على طول
ياسلام خربوا القبايل
يا صاحب النظر بص وطل
لا لون خضره ولا ولد نايل

غانم قاله متلومش على
ماقعدتها من غير عيال طالت
الشاهد ربنا الواحد الحى
اظنها خضره مالت

قال القاضى سبحان علام الغيوب
دى حاجات فوق النهايه
يبقى زهر رزق رجع مقلوب
ياسلام يا فعل الصبايا

فى جنبهم عسقل خد البال
وقال يا عرب خبرونى
قالوله شوف لون العيال
قال ان بكيت اوعوا تلومونى





عسقل بن نايل قريب خد البال
لسان الفتى تقلولى( شعر بثقل فى لسانه)
بيقول ايه الحاصل يارجال
عالمصلحه لازم تقولولى

قالوله تعالى نخبروك
فى الحق اوعى تقاوى
اتعجب على مرات اخوك
اللى جابها تلف التقاوى

بص لقى الولد اسمر اللون
قال ولد يوم مايعيش يومانى
عقله ذهب مثل مجنون
عالغلام جر اليمانى

ح يقطع الطفل بيداه
رزق الامير خدله باله

شافه حايضيع ضناه
وقف الفتى رزق وجاله

قاله يا اخى كل البلاوى ولا دى
كل منهو يحفظ كماله
ان كان عاب فيك ولدى
قولى وانا اقطع لسانه

ليه يا اخى تأذى ضناى
انا فرحت وربى عطانى
امانه تقصد ايه وياى
عقلى ذهب من ميزانه



قاله عسقل فين يا مجنون ولدك
عشنا ورأينا العجايب
ده انت جبت زفاره لبلدك
عنك بدت ابن الجلايب (العبد)

انظر فعالها بعنك
جسمى انضرب بالفراشى(الاسهم)
دى بدت العبد عنك
على جعفلها فوق الفراشى

بتقول ده نسل النبى الزين
الكلبه دى من القواهر
لا نتحملوا فسق ولا زين
وده كلام واضح وظاهر


فى دى سرحان وقفله وجاه
قاله يا عديم الربايه
دى واحده واخده الاله جاه
نسل الحبيب النهايه

نسل الحبيب المكمل
ليه تعيب فى حق الولايا
يا واطى من العيب كومل
تانى ما تقعد حدايا

طرده الملك من الجمع وقام
وحرم عليه المجالس
لا قيمه فى العرب ولا مقام
والقلب بقى غير خالص







سرحان مال على رزق قاله
ده كلام من غير ميعادى
اوعى يهمك من ده كله
اوعى تسمع كلام الاعادى

بيسبوا عرض الصبيه
اسمع كده وخلى بالك
عسقل ده امه رديه
وكان منتظر ورث مالك

قال عسقل وهو منصرف مطرودا
ميتا الملوك بتجيب عبيد
هى دى العايقه بنت ابوها؟
يا رزق الخلاص مش بالايد
دلواك روحها لابوها

سمع القول رزق زاد همه
ابو العروض النضيفه
ساب عربه وفات ولد عمه
وطلع يطير عالشريفه

لم ينجح الملك سرحان فى تهدئه الامير رزق كان مافعله اخوه عسقل قد اوصله للغليان . ترك رزق الديوان وذهب الى المنزل . طرق الباب ففتحت له خضره وابنتها شيحه بجوارها ولم تكن تعلم بما حدث فى الديوان.

راح رزق عالبيت
زعلان والدمع نازل
اتلقته الشريفه وجنبها البت
لا طايق خلا ولا منازل


قامتله خضره على القدمين
عز ما واضعه بدماها
باستله الشريفه على الايدين
فرحانه ان ربى عطاها

قالتله الولد سميتوه
يا عز عرب الهلايل
قالها يا ريتكم سمتوه (سممتوه )
ولا ظهر فى اولاد نايل

قالتله وعيالك متغير دمك
يابو شال عالقرن مايل
حد زعلك فى ولاد عمك؟
دريد ......ولا هلايل؟

قالها سبب زعلى انتى
يا ام الحلق والسفيفه
لا عاوز دكوره ولا نتى
مكنش الامل يا شريفه

يصح يا خضره خلوفتى عبيد؟
تعالى نخبروكى
ماعدش الخلاص بالايد
قومى روحى بيت ابوكى


وصار ينشد بهذه الابيات رزق ويقول
صلوا على صاحب المعجزات
********


الحق يشهد والكتاب المنزل

بأنك رسول الله طه الافضل

قد جئتنا ببشائر وفضائل


وشهرت للدين القديم الاولى

مقالات رزق العامرىالجعفرى

ابيات شعر مثل حظى الفلفولى

(تأليف) الفته والقلب منى مغرم

على ماجرى من خضره خربت منزلى

جبت الشريفه هاشميه منسبه

قد خاب فيكى يا قبيحه امالى

جبت الكحيله جيده مفيكيش دنس

كيف عبد غيرى فوق سرجك يعتلى؟

خضره ارحلى من منزلى

ثم ارحلى مع عبدك الاسود (طفلك) ولا تتمهلى

ان ما رحلتى يا قبيحة بالعجل

لاقص عمرك بالقضاء المنزل



قالت فتاة الحى خضره اللى شكت

**************


انا شريفه ابويا ذو النسب العلى

انا شريفه هاشميه منسبه

جدى رسول الله طه الافضلى

انا شريفه من قريش لم بى دنس

ايش وصله العبد يعلو جعفلى(جسدى)

ايه وصله العبد يدخل كرمنا

وكرمنا عالى وزربه (طعمه) حنضلى

عجبى على رجل يعارض خالقه

اذا ما خلق بعوضة او جملى

من بعد هذا نمدحوا طه النبى

احمد رسول الله طه المرسلى




قالت له الشريفه بطل كليمات
يا فارس يا حلو المعارف
اصل احنا لحمنا من كليمات(من اكله مات)
مر يا رزق وانت عارف

انا شريفه نسل النبى الزين
وكيف العبد يوصل فراشى
انا خاليه من الكدب والزين
كلام اللى تقوله ما طراشى(لا يطرى)

قاللها اومال يا كلبه عبد مين
اللى دخل دنس المطارح ؟
وانا امير العرب المتين
انا رزق ابو عزم بارح

عبد مين ده اللى جنى بك؟
كلام الاعادى بكانى
شاف بطنك وشاف جنبك
عالفرش حضنك بكانى






على دول يا رزق وصلى على الزين
يا امير اهين يا قرة عيونى
ده انا خاليه من الكدب والزين
وحرم الدنس عن هدومى

يا رزق واللى قالك كده مين؟
يا سيد العمامه النضيفه
وحشم القول يا امير
انا من عضا طه شريفه

يا رزق ميتا الكلام ديتى يتقال
وحياة رب البرايا
انت زعيم وصاحب مقدار
يا رزق صين الربايه

وحياة النبى الزين
وانا قاريه حروف الهجايه
وخاليه من الكدب والزين
ما فيه زول نظر غطايا

كل الكلام ده يعلمه الله

انا وانت يوم القيامه
حا نقف بين ايادى الله
وناخد حقنا بالسلامه

ابليس مسك المرايه ليك
دموعى فوق خدودى جباكم(طالت اكمامى)
ايش قولك متعملنيش زوجه ليك
بس اربى الغلام فى جباكم

قالها كلامى وتسمعيه
يا خضره ونخبروكى
اللى يعجبك فى البيت لميه
وتروحى ديار ابوكى


دلوقتى ارحلى من بلدنا
وحياة الكعبه الشريفه
وده عبد ما هوش ولدنا
وعمرك ما كنتى عفيفه

قالت الحره امرى لربى
طلعت تبكى بحنانا(حرقه)
وتجيب من الطين وربى(تتطين)
عملاه كأنه حنانا(حنه)

اتت شيحه بدموع العين
انا نار قلبى شقيقى(قلبى انشق)
يا بايا مودى امى على فين
طالعه بأخويا شقيقى

قال تانى منك ما اسمع كلام
الا سيفى فى النحر شاطر
سيبونى وحدى فى غلب والام
اهى الاهره تجيب اواهر

البنت قالت يا مولاى
اهين يا يوم الندامه
طفله وسكن الهم حشاى
يا ماى مع السلامه



راح الخبر للملك سرحان
حمول البلا مش خفيفه
بكى ودمعه عالخد سار حن
قالوله رزق طرد الشريفه


اتى سرحان حافى القدمين
قال يأخى ارضى بحكم سيدك
ما عرفتك معانى الكلام زين
ليه تخرب ديارك بأيدك

ما قلتلك يا بن عمى
ده كلام من غير معادى
انا عيونى م النوح عمى(عميت)
ان ده كلام الاعادى

اعلم ان عسقل غضبان
يا بطل ماتخلى بالك
بيسب عرض النسوان
كان مستنى يورث فى مالك

وماكنش عايز يجيك غلام
ولا يعمر ديارك
ادى معنى الكلام
يا رزق طفى نارك

رزق قال نفسى ما قبلاش
تاخد ابنها وتزول من حدايا
اللى ضحكت عليا الناس
هذا الغلام مش ضنايا

سرحان قال ليها رب موجود
اعطيها انا ... ناس يروحوها
الى مكه السعيده تعود
وتوصل لبيت ابوها

خضره قالت وحق النبى الزين
ياللى وشوشكم زى المرايه
مدام تهمتونى بالفسق والزين
ولا ذول منكم يطلع ورايا

عندما وجد الملك سرحان ان رزق مصمم على قراره بطرد خضره الشريفه طلب ميراث الطفل من رزق . كل ما يصل اليه مدى القاء الحربه فى مال رزق من الجمال والابل يصبح ملكا لابنه الطريد. لم يهتم رزق فى ثورة غضبه ووافق على اعطائها كل ما تريد حتى لو تمكنت من اخذ اعمدة القصر فأنه لا يمانع وصمم على التبرؤ من ولده وعلى طردها فورا من نجع بنى هلال .
حضر سيدنا الخضر صلوا على الزين فى صورة رجل عجوز مسنود على عصاه وقال ل خضره الشريفه عندما يطلبوا منك اختيار الشخص الذى يلقى لكى الرمح فى مال رزق اختارينى فأنهم يريدون اكل مال الطفل .


قالت اخترناكم دون اى نجع
وقبلنا نيجى حداكم
ما خدنا منكم غير الدمع
والجرسه منكم هتاكم

ياللى اتهمتونى بالبطل
البين وسطينا حاجل
ادينى بانظر وباطل
مش لاقيه فى الجمع راجل

مدام ضنايا طلع عبد
وما طلعش يشبه لناسه
مش حأتمنكم يوم العد
ابدا ولا اضمن ميراثه

خضره قامت بالاعيان
قالت انا عايقه وبنت ابويا
اخترت الراجل الغلبان
ياللى وشوشكم تنقض وضايا

ضحكوا جميعا فى قلوبهم لسوء اختيار خضره الشريفه وتعجبوا ان يستطيع هذا العجوز الغلبان
ان يلقى بالدبوس انه بالكثير قد يستطيع ان يحمله فقط . تقدم سيدى الخضر وامسك بالدبوس والقاه فى الهواء .


مسك الدبوس وحدفه فى المال
تقول بحر يوم الزياده
جاب لها من مال سرحان جمال
ومن مال رزق ما فضلش حاجه

ليها خد المال كله
وفرح سرحان جاها
قال الفعل ده فى محله(اقتنع ببرائتها)
الست دى الرب جاها

ليها رب وخداه لها جاه
يا اصيله مع السلامه
تبكى وعادمه اللهجاه(النطق)
ودموع تجرى سلامه

اما سعيده فا بتنوح
سايبه راجلها وراها
القلب م الغلب مجروح
الريح غلبت موجاها

قالت يا نجاح هنا ارتاح
حمول البلا مش خفيفه
انت مع سيدك يا نجاح

وانا رايحه مع الشريفه

(ودعوهم)عزموهم النسا بلا سال(صوت)
وطلعت خضره لمه غطاها
تبكى وليها دمع سيال
متوسله بالبدر طه





استدارت ودمعها سال

وقالت كلام ع اللى حاصل
بتقول يا سامع منى خد البال
على كلام حلو من خضره حاصل

يا نجد منك رحلنا
بتبكى مدامع عيونى
ياريت كانت فقدت روحلنا(ارواحنا)
ولا بجرستى شيعونى

ياريت فقدت روحلنا
ولا سبوا عرض الاماره
هناك فى بلدى قاعده رحلنا(زكرنا)
ولا نسيوا ست العذارى

روح يا نسيم الريح لسرحان وقوله
وحياة قطب الولايه(الخضر قطب الاولياء)
انت عملت المطلوب كله
الله لا يبهدلك ولايا


روح يا نسيم لغانم وقوله
ما عارف حلالك من حريمك(حرامك)
يا بعيد رزقك ربى يقله
والهى يبهدل حريمك




ودعوها النجع ورجع
وساقت هى البهايم
مليانه مر وفيها الوجع
والقلب كالقدر هايم(يغلى)

ياسلام لما مروا فى جبال
كفراء ويا خلاوى
والدمع عالخد لاجبال(كلجة الماء)
شربت مرار وخلاوى

وصلوا لوادى بنى عقيل
فى المسير والدمع نازل
من مخها ذهب العقيل
غابت الديار والمنازل

وصلت البلد دى مسا . ليل
دلت فى ريح المدينه
اتارى رجال طالعين مساليل(متسللين للنهب)
على نجع قاصدينه

كانت جيوش بقيادة عطوان ابن طلحه ابن عقيل فى طريقها لنهب اموال الملك فاضل ابن بيسم ملك
ارض العلامات (مضارب الزحلان) عندما وجدت خضره الشريفه بتلك الاموال الضخمه فقررت نهبها بدلا من غزو مملكة الزحلان


عطوان لما نظر وشاف المال
طمع فى مال الاميره
صرخ ابن طلحه وقال يا رجال
فرجت علينا بأموال كتيره

فرجت علينا بأموال شتى
يالله بنا يا رجال ننهبوها
وكان الاوان ده وقت شتى(شتاء)
هيا الى الخيمه دى نكشفوها

حود ورجاله وراه
بأيده وجر العصايه
لا فكر عنده ولا راه(رأى)
انظر وشوف الحكايه

سحبوا العصى من الخرزان
الدنيا ...... ركركوها
نزلوا ضرب فى البل والمال
والنايمه ..... وقفوها

الشريفه فى الخيمه قالت لجاريتها سعيده

يا سعيده بصى شوفى مين
عقلى عن الفكر صايم
تكالى على رب العالمين
ليكون وحش نزل البهايم

وقفت الجاريه على القدمين
العقل موزون فارس(فى الرأس)
يا دوب بصت بالعين
شافت السلاح والفوارس

شجعان عالخيل راكبين
متقلدين باليمانى(مسلحين بالسيوف)
للمال ده طمعانين

جمعوه شمالى ويمانى



قالت يا ست هجموا اعادى
رجال كتير وحمولها تقول(ثقال)
اتونا من غير ميعادى

قامت الشريفه بكل اداب
وتقدمت ... للمجالس
قالت ده احنا ضيوفكم قدام الباب
ولايا ... قلالات رجالى

احنا ضيوفكم ونزلاء
شوفوا دموعنا وبكانا
شوفوا نفوسنا ذليلاء
عيب عاللى يأذى ضيف فى بكانه(مكانه)

عيب عاللى يأذى الضيوف
ضيوفكم راحلونا
وعلينا الذل مكشوف
امانه اوعوا تأذونا

خضعت باستله الركابات(الحذاء)
ام العروض النضيفه
لما وطت وقعوا اللثامات
ظهر جمال الشريفه

لما وطت ظهر جمالها
القمر يحاكى ضياها

فى الوقت ده مين يجاملها
غير الكريم مولاها

بص الجبان ابو قلب مريض
اللى حصل ليه ما راحش(ليته لم يحدث)
انظر لما ربنا يريد
قام طلب منها امر الفواحش


قال يا صبيه تعالى لجاى
عبد شافك جه مالك(يصبح ملك)

قضيت عمرى رايح جاى
ما رأيت حد ف جمالك

كام يا حلوه ما نورك زين
قلبى عليكى هايم
اسمحى نختلى ساعتين
وما عايزش منك بهايم

قالتله يا فارس وجهتك فين
الدمع لماه فى كمى
ده انا والده ليا يومين
والدم ده سايح منى

اياك تغرك كتر الاموال
اللى فى علم ربك يتامى(يتممه)
فى المال ده اسأل عالسلسال(الاصل)
تجد المال ده ورثاه يتامى

بظلمك زودت همى
باكيه ولسه ما نشفت دموعى
حرمه وحيده واضعه بدمى
لسه ما تميت سبوعى

قال دمعى نزل كيه النهر ده
لازم تجينى واجيلك
ان كنتى والده النهارده
بيمين يا زينه ما اقيلك(ارحمك)



قالتله فى جاه النبى الزين
جسمى على النار غالى
انا خاليه من الرجس والزين
اوعى تبهدلنى ده العرض غالى

قطعنى واضربنى بالسيف
اللى اتبلا ما تلوموشى
انا صاحنه الصبر وبا سف
لكن العرض ما تمسهوشى

وليه وحدى بلا رجال
من الغلب شقت الخلايق(الملابس)
وشكت البلا للمتعال
قالت انجدنى يارب الخلايق


قالتله خليك رحيم
خلينى امشى فى طريقى
المال لطفلى اليتيم
ولاجله نشفان ريقى

ده كان له اب واليوم رماه
وشمتوا فيا الاعادى
عطوان مسك ابو زيد ورماه
بقوه ... فوق الاراضى

من حجر امه خطفه ورماه
قالت لمين يا دنيا اشتكيكى
اه يا حشايا يا كبدى اه
يا ارض احفظى ما عليكى


قام خطفه قطب الرجال(سيدى الخضر)
وحياة رب البرايا
وحزم ابو زيد بحزام
وعلى قمصان رمى العبايه



عطوان له ابن عم يدعى سلمان
فتوه....... واخر ربايه
قاله . احنا ايه؟ مش مسلمان؟
يا واطى يا بن الهفايه

يا واد يا عديم التربيه
بيمين .. اعدم شبابك
والله ما تمس الوليه
لاحرق كبار اللى جابك

وسكر سلمان بلا كيف
وجرد بيده اليمانى
على عطوان قام جرد السيف
سلمان واقسم يمانى

ما تمس عرض الوليه
لاصبح عيالك يتامى
اصلك خسيس وامك رديه
راجل ما تخشى ملامه

وصرخ سلمان الفتوه
انعزلت رجاله فى جاره
سلمان كان عنده قوه
اخدهم علاوله فى جاره




اخدهم ضرب بالسيف
عطوان بقى منه هايب
مبقاش غير تجرحوا الضيف
قدامه ولوا هرايب

جاب اللثام ورجع لها يقول
يا زينه لمى غطاكى
كل البلاوى ولا دول
لو منى انا اموت معاكى

قالتله الشريفه ينجيك
ياللى حفظت عرضى ودينى
وكانت النصره على ايديك
وعاديت اللى يعادينى

رحلت الجميله على الهجن
والقطب ماشى معاها
تسمع خطاويه بالودن
لحد ما ظهر وجاها

قالتله تعالى احنا فى العرض
سقانى الزمن وانت قاعد؟
حدفوا حبيبك على الارض
ماعرفش مات ولا قاعد

قالها ما فى الحضن خدناه
حميناه .. واهو معايا

بحزامنا ... حزمناه
وقمصان لبس العبايه

اخدها القطب اهو وسار
حياة المشرف نبينا
قالها معاكى مشوار
بعيده طريق المدينه




من مقصده الجنه يصلى على النبى

نبى عربى....... ظلت عليه غمام

نبى الهدى لولاه لم نعرف الهدى

قطع العدا... بالمرهف الصمصام

قد خاب عبد لا يصلى على النبى

طه النبى.... صاحب حرم ومقام

من بعد تمجيدى فى جمال محمد

اقرأ لاشعارى..... ومعنى كلام

تقول فتاة الحى خضره اللى شكت

بدمع جرى....... القلب زاد الام

الا يا عباد الله..... يا ميلة الزمن


ان الشقى........ لا تسعده الايام

يعدوا الليالى الطيبين .. بطيبهم

وتأتى ليالى .. مظلمه .. اعتام

ولا كل من ذاق النوى يعرف الدوا

ولا كل من.. يتلوا الكتاب.. امام

ولا كل من خاض الردى يطعن العدا

ولا كل من عادى الرجال... همام

ولا كل من اودعته السر... صانه

لا يكتم الاسرار الا......... همام

ولا يفضح الاسرار الا ابن زانيه

نجوس اللبن... من قوم ناس لئام

مقالات خضره عندما شطها النيا

والامر لله العلى العلام

استغفر الله العظيم من الخطأ

اله العباد .. القادر .. الحكام




ماشيه فى ارض العلامات
ربك جعلها سبايب
وهيه ماشيه ما علامات(علمت)
ربك حاضر ليس غايب

الملك فاضل رئيس الزحلان
راجل زين حافظ مقامه
هذه عناية الرحمن
ليلتها كان شاف رؤيا ف منامه


فضلت خضره تودى وتجيب
والفكر كيه بحر لاطم
والقلب قالب تقاليب
ومليان للعين ولاطم

اتاريها ماشيه لارض الزحلان
الشريفه بنت الافاضل
اتارى خضره ست الدلال
وصلت مدينة فاضل

وصلت لارض العلامات
تبكى الوليه بحنانا
الان النفس بقت علامات(على موت)
قالت مال ضهرى وحنانا(انحنى)



فاضل رأى رؤيه بالليل
راجل جد حافظ مقامه
يصحى يلقى الدمع بليل
من رؤيا رأها فى منامه

قال قلبى للنور رمال
والا حا هجر منامى
انجدونى بواحد رمال
يفسر معنى منامى

بعتوا للرمال وجابوه
من ارض النعام كان شاطر
صنعوله .. الاول .. وجابوه(وجبوه)
عادات الملوك الاكابر

فاضل قاله يا رمال
قاله نعم يا امير
قال قلبى حجر ورمال
وطعم الحلق حنضل وميرى

رأيت اول الليل سبعين
وكتفى بالحمل مالى
مكثوا فى البلد سبعين

نهبوا نسائى ومالى

وفى اخر الليل سبعين صغار
حلوين ساعة التمالى(التأمل)
حرسوا البلد وحموا الدوار
ورجعوا نسائى ومالى





الرؤيا هاجمه عليا
تعبان والقلب دايب
اتربت فى قلبى عليه(عله)
ساعة رؤيتى للنوايب

قاله الرمال الرؤيه دى خير
اعلم يا زعيم وخلى بالك
انها خير اول واخر
اعلم ده خير من الله جالك

السبعين اللى اول الليل
اللى هجموا يمينك شمالك
عطوان وسلمان من بنى عقيل
كانوا جايين لنهب مالك

بين الكبار والصغار
وقع الجفا والندامه
ربك هزم الجبار
بأيد قمصان وسيده سلامه

ودول جايين يتربوا على ايديك
اطفال ...... وحافظ عليهم
حا يكونوا سندك وملك ايديك

تنول النصره على ايديهم

العز والفرح ليك
يا عز العرب يا اميرى
خليهم شجر يضليك
ومجدك حايبقى كبيرى

فاضل قال الحمد لله
قناديل تنور مكانى
انا اركب بجيشى والقاه
ودول حبايبى ونور عيونى


طلعوا يستقبلوا ضيوف الولايات
بأطفالهم............ الصغيره
اللى قال عليهم الرمل ولايات
بفرحه......... كانت كبيره

فاضل طلع بره البنيان
راجل قدر دكه ... وديه
قال الحقونى يا عربان
انا بعينى محقق وليه(ارى امرأه)

ماشى ملك عرب الزحالين
والبيض غنت وراهم
كبار البلد شمال ويمين
ووراهم تغنى نساهم

من البعد خضره جايه
وسعيده ماشيه وراها
والمال بحر بموجايه
بصت فى كل جاها

من البعد شافت الرجال
مخاوفها تانى خدوها
من كتر ماتشتت البال
فاكره عدا وحايبهدلوها

قالت يا سعيده... يا ندمى
ابكى يا مدمع عيونى
ياريت قبل ده كان عدمى
ولا العدا ...... يبهدلونى

قالت سعيده . صلى على الزين
وارمى الحمل عاللى نشاكى
ده انتى عند ربك تعزين
ولا شىء من الغلب جاكى

فاضل قال محقق وليه على جمال
غريبه ولا نزيله
فيها حسن بادى على جمال
اخبرونى من انهى قبيله

اتقدموا العرب يجاوبوه
فاضل شاورلهم بيداه
نادى على رجاله جوه(اتوا اليه)
سيبوا الركب ياخد مداه

قال ارجعوا يا عربنا
دى اوامر نفذوها
دى ضيفه دخلت ديارنا
وغريبه ..... لا ترجفوها


رجعوا رجال الزحالين
وتقدمت اليها الولايا
باسوا ايديها النساوين
وفرحوا بها للنهايه


دخلوا المدينه بفرحه
وعندما خطوا العتايب
خضره اصبحت فرحه
لا معرفه وصبحوا حبايب

فاضل من الفرحه قال
يا اصيله نارت البوادى
يا اصيلة العم والخال
يا اميره من اى وادى؟

يا اصيله انتى منين
شايفك ضعيفه وهزيله
عدوان ولا محبين
قوليلى من انهى قبيله

قالتله خضره بتسأل عليش؟
لسه ما سكنت عنينا
ولا دقنا لك ماء ولا عيش
ميتا لازم تسأل علينا؟

قال يا بنتى حقك عليه
م الفرحه لا تلومينى
من جهة الحق . حقك عليه
وادى سيفى ... قطعينى




قالتله تسلم ويطول عمرك
سلامتك يا ملك الاماره
احنا بقينا تحت امرك
ولله.......... كل الاماره

مدام خلاص قلبنا ارتاح
خدوا الابل دخلوها
اداها سرايه تعيش اخر راح
ضيفة الملك اكرموها


اخد المال خلطه عالمال
المالين بقوا مال واحد
ورمى حموله على المال(المولى)
راجل يذكر الله واحد

قالتله انا نسبة النبى الزين
قاريه حروف الهجايه
خاليه من الكدب والزين
عايزه اربى ضنايا

وقبل ما اطل وابات
طلبى اللى جيباه معايا
واهم من كل الطلبات
عندك كحيله ركوبة ضنايا(ابنة فرسة رزق)

عوزاها عندى تكون فى القصر
اسقى ... واربى ... بأيدى
انا لسه ولدى باعه قصر
لكن بكره يكبر يا سيدى

جابوا الحمرا بشارة نجاح
ساعتها بس زارها المنامى
والهم عنها ولا و راح
وشكرت رب الانامى

اعطى لها الملك فاضل قصرا وسط قصور زوجاته الاربع وامتنع عن زيارتهم محافظه على احاسيسها وحتى لا يذكرها بالمعاناه التى مرت بها وان كان لا يعرفها وكانت هى تسابق الزمن فى تعليم ابنها الذى كان يتمتع بقوه غير عاديه الى جانب ذكائه المفرط وقدرته على استيعاب العلم .
عند بلوغه سن الخمس سنوات انهت تعليمه وطلبت من الملك فاضل ان يرسله لمدرسة الامراء
لكى يتعلم على يد المدرسين . كان الطفل الاسود الوحيد بالمدرسه مما عرضه لمحاولات الاعتداء
عليه من الاخرين وهو ابن الملك ولكنهم كانوا يعرفون قصته من اهاليهم .


تمت فى داره ثمان شهور
ما نورش سراج فى بيته
فاضل كان فى الكرم مشهور
ابدا ما نام على فراش فى بيته

تاسع شهر هرجوا النساوين
والدموع هطلت موجانا
قالوا القطيعه دى ترضى مين
تاسع شهر عشان ايه ما جانا

راحوا يسألوه الامرا
يا عارف الحلال من حريمك
ايه القصه وايه الامرا
ليه هاجر فراش حريمك

قال اتأدبوا يا زحالين
حملى طحن الغريبه(الاكتاف)
انا هاجر فرش النساوين
خوفا تغير الغريبه

وتفتكر زوجها اللى كان
وتبكى بحسرتها تانى
عشان ده حرمت المكان

وحلفت الزم ديوانى

قالوله الامرا تسلم يا فاضل
ويطول عمرك معانا
عشان م انت غندور وفاضل
الله مانحنا المعانا(العون)



تمت فى بيته سنه حول

حره ما تركت خباها
ولا يوم قالوا عليها قول
ولا حد ابدا رأى دراها(ظلها)

اصيله ونعم الاداب
سنتين بعد اللى راحت
تلات سنين لم فتحت باب
ولا عيونها لحد لاحت

لما تمت خمس سنوات
صيت سلامه ملا المدينه
والناس عليه ثنوات(اثنت)
نسل المشرف نبينا

فى يوم طالع والخدم وياه
عاملله اتنين عبيد خادمينه
لما يمشى يمسكوه من يداه
واحد شماله وواحد يمينه

مارين نواحى الديوان
الى نحو كرسى الرئاسه
نظره الملك بالاعيان
قال هاتوه جنبى ديوان السياسه

ده ولدى ولازم اربيه
وارعاه بكل العنايه
ده فضل من عند ربيه
الاسمر ده نور عنايه





خده فى حضنه وجلس
وسط الرجال الافاضل
كان طفل والعقل ما جلس
قام مسك دقن فاضل

الملك بيشيل يده
الواد ابو وجه ماضى(مضىء)
وتق فيها وشده
وقع الملك عالاراضى

جه واقع السلطان على الارض
وقفت جميع الوزارى
طره .. بالطول والعرض

وحسوا بغصه وزاره

عايل . طفل . يدكمك كيف
ويوقعك ... وسطينا ؟
سكرنا يا زعيم بلا كيف
ما تقولنا ... يا حمينا

فاضل قال اتأدبوا يا زحالين
ناس عدمتوا الربايه
انا اللى وقعت ولا وقع مين؟
انا بالعب مع ضنايا

بتزجونى ااذى ضناى؟(تحرضونى)
والله اللى ما يقدم استقاله
لارميه بسيفى ده اللى ف يداى
لان دى مش عادات الرجاله


قدموا استقاله وقبلها
عادات الكبار والاماره
وياما وزارات سقطت قبلها
وفى الحال شكل وزاره

غيرها والامر قد تم
العز والفخر ياما
مربهوش رباية ايتام
ده ابنه واسمه سلامه

اتمت خضره خامس عام
ومن السر اللى ف حشايا
انا عايزه استاذ لولدى
يعلمه حروف الهجايه

ارسل لها لكلامك طايعين
وحياة الصدق والامانه
لازم له طبعا تعليم
استاذ عظيم فيه حدانا

ودوه مدرسة الامراء
مع اولاد الامرا وفاضل
ابنى .. لا غش .. ولا مراء
اوعى فى واحد تفاضل

دخل مع ولاد السلاطين
رباية الرجال الافاضل
من دون الاولاد متين

زايد عن ولد فاضل




الشيخ شافه سكران بلا كيف
ماشاء الله ع الواد تبارك
قاله الخطيب قول الف
سلامه قاله تبارك

قاله مين علمك . قاله مولاى
من الله واقفل معايا
انا مولود مرباى
وعاطينى رب البرايا

ندهش الشيخ صالح العقيلى من اجابته . اقولك قول الف تقول تبارك . تبارك ده تانى جزء من القرأن . قال له . هذا عطاء الرحمن . قال له الشيخ اسمع منى ما اقول وان جاوبتنى يبقى الكلام معقول ..... قال الشيخ صالح العقيلى



انا استعين بالله واصلى على النبى

نبى عربى نوره عن البدر ظاهر

يقول الفتى صالح المعلم وما نشد


فسر كلام شعرى اذا كنت شاطر

اسألك عن اول ولا لهوش تانى

ان كنت فى رد الجوابات ماهر

واسألك عن اتنين ملهمش تالت

اخبرنى معنى القول يا ابن الاكابر

اخبرنى عن تلاته ملهمش رابع

وعن لاربعه اللى رضات الخواطر

والخمسه قوللى ان كنت فى المعنى يا بطل

وقول عن السته اذا كنت قادر

والسبعه مين؟ انهض وقوللى يا فتى

وعن التمانيه اللى لهم نور ناير

والتسعه برضه ان كنت تقدر تقولنا

والعشره لو باعك طويل ومعافر

ادى سؤالى لك شرحته يا بطل

ورينى معنى القول اذا كنت خابر



رد ابو زيد بالجواب وقال له

اصغى لمعنى كلامى باطن وظاهر

تسألنى عن اول ولا لوش تانى

ده ربى تعالى حى . حنان . قادر

وتسألنى عن اتنين مالهمش تالت

ده الليل والنهار فى فلك دائر

وعن التلاته يا شيخى طبعا اخبرك

طلاق التلاته معتوق به كل كافر

والاربعه دول الاربع مذاهب

وانبأك عنهم ما تقدر تكابر

الشافعى والمالكى والحنبلى والحنفى

الاربعه الديمه رضات الخواطر

والخمسه يا صالح . فراضات الصلا

عالمؤمنين فرضوا عشيه وباكر

والسته برضه لازم عليهم اطلعك

السته م الايام اذا كنت فاكر

خلق ربنا فيهم الدنيا وارسى جبالها

وخلق بها الكثبان وكل بحر زاخر

والسبعه يا استاذنا ابواب جهنم

يا رب نجينا .. وراهم مجامر

اما التمانيه دى ابواب جنة العلى

اوعدنا ربى بجاه ابو نور ظاهر

والتسعه لو تسمع كلامى يا فتى

دول التسع ارهاط والامر ظاهر

دول التسع ارهاط من قوم صالح

واوعى تجادلنى واوعى تكابر

والعشره دول احباب نبينا

طه الحبيب احمد ابو نور ناير

مبشرين بالجنه طبعا من اذل

اصحاب نبى الله ابو زكر عاطر

وادى جواب السؤال يا صالح شرحته

سهل وبسيط ده اول رموز الدفاتر

و استغفر الله العظيم من الخطأ


الهى تعالى ليس مثله قادر



نظرله الشيخ وقاله تعال
وحضنه وباسه فى خدوده
وقالله عطاك الهى المتعال
وفرح تمام بوجوده

خد باله منه وترك الجميع
فضل مراعى لابن الهلالى
انزرع حبه فى قلبه طبيع
انظر لامر مولى الموالى

لما الشيخ حيز بيه
زعلوا ولاد الاكابر
كل اللى حواليه وجنبيه
اصغر ما فيهم ما عدش صابر


قالوا العبد ده ابن الرديه
ياخد رضا الشيخ خالص؟
لنشربه كاس المر ديه
والقلب بقى غير خالص

ابن اخو الملك زغرله شين
زغر زغره بالله السلامه
اتاريه منافق بوشين
ونوى لغدرة سلامه

انتظروه وهو راجع
مراوح وقصدوا البلاوى
نظروه فى لحظة ما هوه طالع
والعز والفخر داوى



قالوا له الى اين يا ردى؟
يا كلب يا ابن الغريبه
كل البلاوى ولا دى
وجهك كيه جناح الغريبه(الغراب)

سلامه قال له فورت دمى
والحمل دش الغرايب
تيجى منك وانت ابن عمى
ايش حال قول الغرايب

ده انت ابن عمى يابو سليم

والله دى عيبه منك يا .جوده
ماتخلى قلبك سليم
ميتى احنا على بعض جوده؟ (جدد)

ميتى احنا على بعض جداد
ده انت ابن عمى شقيقى
هو ده اللى قلبك بيه جاد
الجرح ملك الشقيقى(الصدر)

قال له من فين انا ابن عمك
ده انت جاى لاجىء حدانا
حايكون فى الدم عمك(عومك)
وبالله ما تقيم حدانا

جوده خطا بالقدمين
من الهول يالا السلامه
شيع ايده بقلمين
فى وجه الهلالى سلامه







قلمين انما ع الوجه
على اليمين وعلى الشمالى
قال زى ما وجهك وجه
غضب ولد الهلالى

مسكه الهلالى وهزه
من عينه فجفجت دموعه
فى طبقته تحت بزه
رماه عالارض قفص ضلوعه

وسحب عصايه خرزان
وخده يمين وشمال
قام بهدله فى كل مكان
لما دمه عالارض سال

ضربه لما شرشح رجاليه
ودموعه عالخد سالت
وصمم حا يقطع رجا ليه
وحموله على كتفه مالت

الاولاد فاتوه وولوا

تركوه والدم نازل
كا قلع مركب وحلوا
طاروا طير عالمنازل

وراح جوده يبكى ينوح
للوالده فى الحجايب
والدم منه يبوح
قالت دى نادره من الغرايب



اللى ضرب ولاد الملوك مين؟
مين اللى هانك يا نور عيونى؟
لازم ما يعرفش انت مين
فاكرك عبيد ولا دونى

يا جوده اللى يضربك مين؟
ده ما يعيش ولا يوم واحد
يروح بالسلاح قطعتين
ابوك قلبه عالخصم جاحد

قال انا بكيت وفار دمى
والحمل دش الغريبه
تصدقى؟بهدلنى يا امى
العبد ولد الغريبه

ابن اللى عند عمى
الواد اللى اسمه سلامه
ضربنى وسيح دمى
ورمانى ضنين السلامه


قالت عشنا ورأينا العجوبات
اهدى فى نفسى.... ما مالك
يبقى الكلب ابن الجلوبات
غريب.. ويقتل ولاد الممالك؟

غريب ويقتل السلاطين؟
نهاره لون الغبايب
لاخلى امه تشيل طين
ويزور لحد الترايب

كان الشيخ واسع الذمه ومرتشى ارسلت فى طلبه وعرضت عليه زيادة راتبه اربعه دينارمقابل ان يشفى غليلها من ابن الغريبه وافق ووعدها بالويل لهذا العبد الاسود الذى تجرأ على اسياده .


صبح الصباح والضيا لاح
وحضر الهلالى سلامه
قبل الاولاد كلهم راح
يسلم وقلبه سلامه

قال صباح الخير يا استاذ
يا اقرب من القلب ليه
مقدارك كبير قلبى بيك زاد
وصاحب افضال عليه

قاله يا ابن الغريبه بطيت ليه(تأخرت)
كل الولاد سمعونى
هوه العلم يتكبروا عليه
وجاى كده تلوج بالعيونى

سلامه رد عليه الجواب
قاله كلامك ما صايب
كيف تبقى عالم وكداب؟
دى نادره من الغرايب

يعنى اول شخص انا جيت
مين قبلى قول اللى جالك؟
يا راجل لا بدن ولا جت(نحيف الجسم)
يا شيخ التفت خللى بالك




قاله كمان بتجاوبنى؟
فى حضور ولاد الاماره
قلبى بيهد يبنى
وعطا لصبيه اشاره

الشيخ اشار لصبيه
فى الفلكه وضعوا سلامه
غضب من سلامه كأنه عدوه
نوى له لدور الندامه


مسك سوط من جلد الجمال
واخده شماله ويمينه
لما حمله عالكتف جمال(جه مال)
والاولاد ... مكتفينه

قاله كفايه فورت دمى
والكلام ده بكره نعوزه
ان كان قليل اجرك يا عمى
بكره اجيبلك اللى تعوزه

اجيبلك عمامه وطربوش
وقفطان حلو الملابس
وغيرى ما تسألهوش
حتيجى قالع وتمشى لابس

قاله ونحن عتقناك
بس اللى شرطته لازم تجيبه
انا عايزك تكون سخيه يداك
والحر يأدى واجيبه

طلع سلامه من ايده ينوح
من غير ذنب وسبايب
فكر فى نفسه وهو مراوح
قال دى نادره من الغرايب

يأذينى الشيخ من غير سبب ليه؟
ما حصلش فى الامر حاجه
اللى جرى يقوللى عليه
بلا نقص ولا زياده

راوح وسايل دمه
اقبل لباب السرايا
بتسأله الوالده امه
ايه اللى جرى يا ضنايا؟

قالها القاضى ضربنى
الشيخ بيده بلانى
بدون سبب وكان حاببنى
حيرلى فكرى وبلانى

قالت يا بنى الحمد لله
يا واد يا ظريف المعانى
العلم نحن وصلناه
وكفايه ما تروحش تانى


اعترضت الجاريه سعيده على هذا الكلام وقالت لسيدتها

الكلام ده لا يرضى الله
لما تأخرى تعليمه
مش الاول تعرفى ايه اللى بلاه
وليه الشيخ حلف يضيمه

الجاريه قالت توصيه
سكوتك ده مش شىء فاضل
اللى يأذيك ااذيه
حتى ولو ابن فاضل

سمع منها الكليمات
وهى واقفه جنب الاميره
الجسم بقى كا مثل اللى مات
واستعدل لبلوه كبيره

جابتله فرخ دبوس
فى الليل ابو الهويدى(هويد الليل)
قالتله خبيه ما تبينوش
بأيدك خد حقك يا سيدى

واللى اذاك ااذيه
ولا تفكر فى اللى حاصل
الصبح طلع مخبيه
ولا خلف قولها واصل

من البعد لاسمر ظهر بان
مغلوب وغلبه تعالا
قال يا شيخنا فطير ورغفان

لطلبك قرب تعالا


الفطير وحمام وجبناه
وطربوش بأحلا عمامه
مفروض نقوم بواجبنا
قصده يقوم بالندامه

وفى الحقيقه لا جبت فلوس
ولا طربوش يحلى راسك
جايبلك معايا دبوس
يبكى عيالك وناسك

وعطاه فى ضلعه الشمال
وزعق زعقة عقاب(نسر)
الدم بظمر كا شلال
الدم لون التراب

قتله ودمه انتشر عالارض
وخرجت روحه ما رجعتش تانى
فروا الاولاد كيف لمعة البرق
واختفى الجميع فى ثوانى

اوصلوا الخبر لاخوه وكان وزير الميمنه فى ديوان الملك فاضل انفجر من الغضب وحمل الرمح وجرى ليأخذ ثأر اخيه من ابو زيد وما ان وصل اليه ورأه حتى تسرب الرعب الى قلبه .


قال له اومال على فين يا عثمان
معدول شردك ورايح
انا شايفك مجرد الزان
اومال على فين يا وزير رايح؟

قاله يا سلامه انا مش خيال(فارس)
وطريقك غير طريقى
بلغنى الخبر قالوه العيال
وانا جاى ادفن شقيقى

قال احسبك جاى تاخد التار
وتفعل امور الفجاره
ولو وراك الوفات كتار
حاخليك ترقد فى جاره



اخذ جثة شقيقه ودفنها وذهب الى الملك فاضل يشكوه ويوغر صدره عليه .


قاله جايبلك عبد زربون
يقتل رجال الاكابر؟
حتى اهل العلوم والقانون
عبدك سكنها المقابر

فاضل همه فرتك الكبد
وصرخ وجاب النهايه
قال مين اخبرك انا ابنى عبد؟
يا واد يا عديم الربايه

ولدى ضنايا اسد قوم
الحل والربط بأيده
يسقى العدا مر علقوم
ودى عنايه من فضل سيده





وفى ثورة غضبه اسند الحكم الى ابو زيد الهلالى وهو طفل .
اتى العيد وبدأت العاب الفروسيه
وكانت تلعب بجريد النخل بدلا من الاسلحه الحقيقيه .
طلب ابو زيد من امه ان تسمح له باللعب
خافت عليه ورفضت لصغر سنه بالرغم من عدم توقفه
عن ركوب الحمرا(فرسته) والتدرب عليها .



قالت خضره اقعد يا ضناى
لسه على ركب الركايب
راميه الحمول على مولاى
ربى حاضر ليس غايب

قالت لها الجاريه قولك مش عاجبنى
حا تطلعيه ياك م الهفايا
ده وعد ومسطر عاجبنى(على الجبين)
بس انت خليك معايا

تقدم الى الحمرا بركات
ادى انتى يا حمرا وادينى
قدميه ما وصلوش الركابات
يا سعيده تعالى ركبينى

خدته الجاريه بالاحضان
ووزنته على سرج الكحيله
عدل الحمرا كا غول غضبان
يخوض الليالى الكحيله

تحتيه.. فاهمه .. مطوعاه
تقول حفظها معنى المعانى
هدايه من عند الله
مفيش بعدها خيل تانى



حقد واتغم لما راه
جوده بن سليم بن بيسم
اللى زمان تشاجر معاه
قال ياريت سقيت الجريده سم

وسحب الجريده جوده وجاه
وطلق عليه ع الركوبه
لاسمر بيده تلقاه
اتعجبوا عالعجوبه

سابوا الخيل ترمح على بعض
وسط الخلا والميدانى
وبين الاتنين انطوى البعد
غير الموت مفيش شىء تانى

خدوا بعض الاتنين بضربات
وكل واحد جريده
كأنهم داخلين حروبات
مش لعب طفل و جريده

جوده اتعدله وجاه
خد بالك م الروايه
ضربها ف سلامه يقطع رجاه
هيفت خليك معايا

لاسمر قام رفع يداه
ولد يحق البعيده(نظره حاد)
انظر لما الرب هداه
قشطه بسن الجريده

ثبت رجوله فى لاجناب
وضربها ضربة اسوده
م الغضب جز عالناب
عدت فى بطن جوده

من الامام نفذت الى الخلف
وقع جوده حضن الترايب
الاولاد واقفين ييجوا الف
الكل ولوا هرايب



مات جوده وحمله ابوه والقاه امام الملك فاضل وطلب قتل قاتل ابنه قال الملك فاضل لاخوه .


يا سليم خليك مرباى
بلاش تزرع ما بينا تعايب
ولدى مؤدب ويعرف رباى
ولدك هو اللى عايب

شكوى مالكمش عندى
معاكم بصاره اعملوها
ده ولدى غالى وكالعين دى
حقوق ابنى انا ما نسيبوها

قاله سليم اشمعنى ابنى انا رخيص
وولدك انت .. العبد .. غالى
اللى جايبه بشىء مفيش
وجوده من ضهرى وحلالى

فاضل قاله ماسمعش منك كلام
ولو زودت حا زود النار لهايب
بالحق احكم واعلى النظام
وجوده جلاب المصايب

ابنك هو اللى ابتدا
وفقد الرشاد والهدى
وولدى لو مدافعش عن كرامته
انا كنت مرمرته وبكته




ذهب سليم الى منزله حزينا واستشاطت زوجته غضبا عندما علمت بما حدث بينه وبين اخوه
الملك فاضل وكانت من العقيليين فقررت الاستعانه بأخيها لتدمير مملكه فاضل وما كان اخوها سوى عطوان الذى قابل خضره واراد اغتصابها منذ احد عشر عاما .


قالتله فاضل يعاند مين
انا قلبى عالخصم جاحد
لابعت واجيب العقيليين
والعبد ما يعيش ولا يوم واحد

لابعت واجيب العقيليين
انا من مخى طاير عقيلى
مدام ولدى عليه يهين
لا علم جيوش العقيلى

لازم ارسل مرسال لعطوان
ما يخلى فى القوم واصل
يقتل فاضل وعبدان(عبده)
ويخلى العلامات خرايب

كتبوا انه خرج فى بلادنا عبد
والعبد فى حماية فاضل
واذا عاش وكبر العبد
فيكم ما يخلى حد فاضل

ان عاش العمر واداه
ربى ومد ف سنينه
ميت الف فارس ما يكفاه
فيكم ولا يملوا عينه




عطوان فتح الجواب وقراه
قال عشنا ورأينا العجايب
دقوا الطبول فى كفور وقراه ( لتجميع الفرسان)
لا بهدل زحلان امرد وشايب

ضربت الطبول وركبت القوم
وعطوان اتى برجاله
راجل يسقى العدا علقوم
جيش من يمينه وشماله

فاضل شاف الجيوش جات
قال ربى حاضر ليس غايب
يا بحر زايد بموجات
بلدى حا تصبح خرايب

قال مدام جونى رجال بنى عقيل
على ابنى نوحوا بندامه
نزلت دموع النساوين
من الهول يلا السلامه



فى طريقه الى الديوان وجد ابو زيد ابوه فاضل يبكى حاملا خطاب عطوان . اخذ الخطاب من والده

ليكتب الرد . قرأ طلبات عطوان ورد عليها .



ابعتلى الجزيه عشر المال
يجيبوها كبار البلادى
وابعتلى العبد شراية المال
خاضع يبوس الايادى

قال ابو زيد لابوه

انت ارتاح عالكرسى يا باه
ومتخافش من اى حاجه
هات الجواب يابا اقراه
ونكتبوله الافاده

كتب سلامه رد الجواب
جوابك يا عطوان جانا
عاوز الجمال والخيل لاسباب
اسبابك ما تلزم حدانا

ان كنت عاوز عشر المال
ومغرور بكتر ناسك
ولو خدت واحد من الجمال
ما يسد حقه غير قطع راسك

وان كنت عاوز نساوين
وراهم نعم الرجالى
فرسان للشر رابطين
احنا سياد المجالى


وان كنت عايز العبد حا يجيك
يأتى حتى لدارك
من هوله ربى ينجيك
ده البحر ما يطفى نارك

وصل الجواب عطوان وقراه
قال الممالك طابولى(وقعوا فى يدى)
لقى الجواب مفيهش وقراه
قال للحرب دقوا طبولى

لما ضرب طبل العدوين
نادى الهلالى سلامه
يابايا طلع معايا الزحالين
اليوم يوم القيامه

فاضل قال انت صغير يا ضناى
تروح فين فى حرب العقيلى
انا الدهر عاكس معاى
من مخى طار العقيلى

قاله ارمى حمولك على الله
مدام مطلعتوش ورايا
اسمحلى وادعيلى يا باه
انا معاى رب البرايا

كان من عادات العرب ان تحضر نسائهم الحروب تغنى لهم وتحمسهم للقتال وفى حالة هزيمة الفارس تؤخذ نساؤه سبايا(اسرى) يفعل بهم الاعادى ما يفعلون او يقايضونهم بالمال .
طلب ابو زيد من عبده قمصان ان يأتى بأمه خضره وجاريتها سعيده ليقفوا خلفه فى معركته ضد عطوان .


يا قمصان انا راق دمى
خلاص رفعت للحرب رايه
قوام تروح تركب امك وامى
علشان يغنوا ورايا

طلع العبد لقصرها فوق
قال يا ستى لمى غطاكى
يا اصيله يا معدن الذوق
اركبى .. امرنى ضناكى

قالت ده عمره عشر سنوات
كيف يحمينى فوق هجينى؟
والاعادى خلفه قويات
يا اتجن يا اما هجينى

قالها ادعى له ربك
واطلبى من الله العنايه
ولا تزيدى همك وكربك
قالت لسعيده يللا معايا


عندما وصلوا الميدان
فرح لاسمر ودفع الكحيله
التفت بعينه لقى ديوان
مرفوع عليه رايه كحيله(سوداء)

دفع الفرس طارت بيه
لقى عطوان عالفرش جالس
ورجاله واقفه حواليه
امراء ونعم المجالس

عطوان التفت بالعين ورأه
قاله انزل يا ابن الجلايب
اكم مثلك قطعت رجاه
ما عملش للموت حسايب؟

سلامه قاله انا عبد رباى(ربى)
صادق .. مصلى .. وفاضل
انت كلب على غير مرباى
اسمى سلامه وانا ابن فاضل

انا ابن ملك الزحالين
ادى الحرب وانزل معايا
نشوف العبد والسيد مين
لابكى عليك الولايا


ركب خرج لبره
وجيوشه تابعينه
والخيل وراه منجره
وعساكره شماله ويمينه

سعيده بصت خدت بال
فهمت وزادت تفاهم
هو اللى كان هانهم زمان
فى الصحرا لما لقاهم

سعيده ندهت على اسمر اللون
قالتله سرى فى ايدى(سأبوح لك بسر)
وقالتله يابو عقل موزون
خد منى وصيه يا سيدى

يا سيدى راوق دمك
اللى حصل يوم ما راحش
اهو ده اللى بهدل الوالده امك
وطلب منها امر الفواحش



سلامه لسعيده قل العين(نظر)
وقال يا جاريه وازاى اتاكم
انتى وامى كنتوا فين
وقت الكلب ده ملقاكم

قالتله كنا فى الدرب الطويل(الحجاز مكه)
والصبر خدناه نابينا
مع الحجاج كنا سايرين
رايحين نزوروا نبينا

حلف لاسمر ووثق بأيمان
مدام اهان عرض الولايا
لاضيق عليه الاكوان
ادى الحرب وينزل معايا

خدوا بعض لاتنين بضربات
يهزوا الجبال الرواسخ
على بعض سحبوا الحروبات(الحربه)
كان طعنهم مر ماسخ

قمصان راكب فى جنبيه
على الناحيه اليمينى
تحلف كأنه جن بيه
قال دلوقتى حاخد يومينى


مخبلين الالافات
طفلين اخر نهايه
ينفخوا زى افات
ووراهم تغنى الصبايا(خضره وسعيده)

فضلوا لاخر النهار
والدمع منهم سلامه
لو فيه جبال تنهار
وقعوا ضنين السلامه

عطوان قام عرض وجاه
جه مقدم العود هايف
وبدال ما يقطع رجاه
راحت حربته وقلبه خايف

ابو زيد ابصر عمل كيف
اسد واخر خلاصه
ميل على خصمه بالسيف
عزل جثته عن راسه

قمصان جه شرق وده غرب
اسوده واخر مهاره
نزلوا الاتنين فى العدا ضرب
فتحوا بيبان الخساره

سلاح يخاطب سلاح
وجنبه عبده عاليمينى
زعق البطل فى العدا صاح
ولوا الجميع هاربينى

الجميع ولوا الادبار
مين اللى يقف قباله
النسا نقروا عالطار
نعم البطل والرجاله

رجع من الحرب فرحان
قالت امه تعيش يا ضنايا
خلاص اصبح القلب فرحان
والدهر زهزه معايا


وصلوا لحد الديوان

ما فيهش ولا عرق فاضل
خضره وسعيده على ابو عمدان(قصرهم)
وسلامه قرب لفاضل

عملت ايه فى الحرب يا ضناى
اخبرنى عاللى حاصل
قاله يابا ساعدنى مولاى
ما خليتش فى الخصم واصل

رميته عالارض بسلاح
من بدرى عارفه قتيلى(سوف اقتله)
وجيشه انتهى وراح
جايبه ورايا ذليلى

وادى سلاحهم كله جبناه
والباقى ولا هرايب
خليت بنى عقيل جبناه
الكل امرد وشايب

قاله قتلت عطوان وناسى اللى وراه
جايل وداغر وجاسر؟
ناس مولودين فى الحرب ووغاه(هولها)
وعليهم ما حد جاسر

قاله ارمى حمولك على الله
ادى بحور البلا المايجينى
اللى حاييجى الحرب وراه
يبيع عمره قبل ما يجينى

بس انت اجلس على كرسيك
فاضل يا ظريف المعانى
وحا ارسى مركبك وارسيك
ولا تحكى كلمه تانى

استمرت حروب بنى عقيل حتى وصل ابو زيد الى سن ال 14 عام قتل فى خلالها جايل وجاسر
وداغر وجسار وعلا شأن الزحلانيين فى القبائل وتوقفوا عن دفع الجذيه للمتحالفين بنى عقيل وبنى هلال .


قاله اعلم يابا جايل مات
سكن اللحود والترايب
من جيشه اخدنا السلاحات
كان حاضر والان غايب

وقتلت داغر وجسار
وجاسر مفيش حد منهم
ركبت بنى عقيل العار
ومن اليوم مش حا امنهم




كانت فرحة الملك فاضل بأبو زيد لا توصف فقرر ان يزوجه بأبنته نجديه ولكن كيف؟ من الفرحه لم يفكر . فرح ابو زيد لقرار والده ولكنه صدم عندما عرف انها نجديه . اخته .


فرح قاله فى النسا مين؟
اخبرنى عنها يا بايا
قاله نجديه ام عيون حلوين
فى الجمال هى النهايه

قال سلامه نجديه اول بختى؟
ازعق بصوتى شريعه؟
يابوى عايز تجوزنى اختى؟
تجوز فى انهى شريعه؟

قاله يابنى يا حلو دمك
ماتطريش كلام الغوايه
نهار ما جت امها على امك
كانت دى كبيره وراها

انت ابنى ودى بنت مرتى
ابوها من نجع تانى
طلبت مره واقبل مرتى(اول مره اطلب )
خللى السعد يعرف مكانى

قاله ابدا ما استمع كلام
منك . حا اروح للشريفه
وان كان قولك تمام
اعود لبنت الاصول النضيفه



فهمت خضره ما يريده الملك فاضل فساعدته عليه وقالت لابنها .

خدها جميله وعذرا
كل المحاسن حداها
يوم ابوك ماجبها عذرا(اسيرة حرب)
نجديه جات كبيره وراها

قال سلامه الحمد لله
ربى المهيمن عطانى
المطلوب فى البال نلناه
وانا من زمان عجبانى

اقيم الفرح وتم الزفاف ولكن ابو زيد لم يقرب زوجته قبل ان يدفع مهرها ويكون غنيمه من مال الاعداء ولم تكن نجديه تعلم ما فى نفسه وظنت ان العيب بها . قالت له .


اللى مانعك عن الوصال ايه
ابيعلك الملك والرهونى
اللى ناقصنى قوللى عليه
لو فيا عيب قوم وريهونى

قالها قلبى مايملش لنسوان
مهما كانت كحلة عيونك
انا اصلى عامل رهان
ومن غيره اكون باخونك

لازم نقوطك يكون مال عدوين
وانا اجيبه غنيمه
ولو مفيش حروب تانيين
مش راح تزول الغيمه

قالتله لا غنايم ولا مال
عايزاك لو بردان وخايف
انا قلبى لناحيتك مال

قرب وبوس الشفايف

مالت خدته بالاحضان
انظرنى وانظر دلالى
وشوف على الصدر رمان
مخفى كا .. سر الليالى

انظر لطولى ورسمى
وانظر لحمرة خدودى
وانظر لتفصيل جسمى
اليلك شكا من نهودى



لم تفلح نجديه فى زحزحته عن موقفه فصعدت الى سطح القصر تدعو الله ان يرزق زوجها بحرب.
اما ما كان من امر بنى عقيل فقد وصلتهم اخبار ما حدث . اتفق مشرف وحجازى بأنه لا فائده من مواجهه العبد والافضل ان يستنجدوا بحلفائهم بنى هلال وينضمون الى المنتصر بدلا من مواجهته.
ولم ينسوا ان يزكروا فى خطابهم انه عبد تسكنه الشياطين لتبرير هزيمة فرسانهم .




كتب جوابه لسرحان

نوم الليلى معادينى

انا بكيت لما دمعى صار حن

يا امير بكره تجينى

يا سرحان يابو جرامونى

يا امير يا ولد الدريدى

الناس عارفه اللى جرى هون

شربنا كاسات الدريدى

ظهر عبد عند الزحالين

ما خلا فى روسنا عقيلى

بهدلها الشمال ويمين

ومسح كبار العقيلى

الاوله قتل عطوان

وبعديه جايل و جاسر

ودغار والجرم سلمان

وطلحه ومخلاش واصل

وبهدل كبار العقيليه

والخبر منه اتانى

ده عند عرب زحلانيه

غندور جر اليمانى

الحقنا يا امير سرحان

انت وكبار الهلايل

انا اصلى بيكم فرحان

مستعين يا ولاد نايل

شوفلنا رزق ولم العرب بيه

تعالوا للعبد ريحونا

انا بقرط على الضرس ونابين

يا اهل الطريقه انجدونا





وصل الجواب لملك الهلاليه
لسرحان ملك الاماره
شاف الجواب ودور بكيه
وقال يا رجالنا خساره

طيب لما قتل ابو جنون وشياطين
ملك . التقيه فين اسد الرجالى
نروحوا فيه احنا فين يا مساكين
ده بقى اسد . ولد قدره عالى

قتل جايل مع عطوان
وجسار وطلحه وداغر
وقتل زاكر وسلمان
ما خلا ولا ذول باين

بهدل عناصر بنى عقيل
تروح فين فيه الهلايل
نهارى ضلم بقى ليل
اجيب منين رزق بن نايل

منين اجيبك يا ولد العم
ياريت عارفلك مكانى
لكنت رويتها بالدم
لكن امرى للى نشانى


ولكن يا عرب محوجاش
مالزمش البكا كالولايه

غير اللى انكتب عينى ماتراش
هيا يا عربنا ورايا

بينا ح نطاوع كلام مشرف واهاليه
ان عصينا ح يبهدلونا
ده من هنا مر وهواليه
ومن هنا راح يقطعونا

اهو موت بالمره يا عربان
ما قدر يكون يا هلايل

ركبوا هلايل وذغبا
ما فيهم ولا ذول غايب
رجال عالخصم ذو غضب
هاجت خيول العرايب

تانى يوم وصلوا لزحلان
الجض و الئن ياما
سرحان امر الفرسان
كفايه البكا والندامه

يا رجال تانى ماتبكوش
اللى انكتب راح نشوفه
يا عرب تتهاونوش
وصقفلهم على كفوفه


كتب الجواب ابو جرامون
سلامى على الملك فاضل
يا فاضل انت فاهم اللى جرامون(جرى من العبد)
فى حق الرجال الافاضل

انا سرحان بن دريد
انا مليك الهلايل
اسقى العدا المر ودريد
واصبح الحمل مايل

ابعتلنا عشر الاموال
والبنات حالين غطاهم
والعبد اللى كله ضلال
ييجى مكتف وراهم

خاضع يبوسلى عاليد
ان فتح باب انا سيده(اسده)
احنا غيرنا ما ظهر حد
يولول على وانا سيده(اضاع سمعتى)

قل له جالك السبع سرحان
ووراه رزق ابن نايل
اسوده وزكرهم بان
مين يجهل رجال الهلايل؟

كتب الجواب بيداه
البطل ابو باع طايل
وسلمه للعبد فى يداه

طلع بيه على ارض فاضل

لما قرأ الملك فاضل ما جاء بالجواب اسودت الدنيا فى عينه واخذ يبكى من هول ما سيحدث لهم على ايدى الهلاليه . اصاب الغرور العبد الذى احضر الخطاب لما رأى بكاء الملك . وصل الامير ابو زيد ليتفاجأ ببكاء ابيه . هدأ من مخاوفه واخذ الخطاب ليرد عليه .قال فاضل


اهو توى اللى حملنا مال
انا قلت مش حابكى تانى
لكن مدام جونى بنى هلال
الموت معاهم اتانى

اللى فتح باب هلال مين
اروح فين يا غلب حالى
ده فى العرب شمال ويمين
كفايه تقول ده هلالى

يبكى فاضل ودمعه يدفوق
من الله يرجو السلامه
ساعة سلامه ما نزل من فوق
ونظر دموعه سلامه

قاله يابايا ماحنا شارطين
وحلفت ماتبكيش تانى
بعد ذهاب العقيليين
ايه حصلك يا بويا تانى

قاله اتونا قبائل بنى هلال
ومين يابنى قد الهلايل
سلطانهم اسمه سرحان
وفارسهم رزق ابن نايل

ده الاسد يخضع امام رزق
يخاف من نظرة عيونه
ليه سيف بيضيق الرزق(يقصر العمر)
والرب دايما فى عونه



قاله ارمى حمولك على الله
شايفك يابا يمكن تجونى(تجن)
حارجع جوابه اللى قريناه
وليها رب لما يجونى

قال يا قمصان خد عبد سرحان
غديه فى ضل الجناين
اخده من ايده وسار حن
لا اخلى عقلك جناين

اتفضل يا خالى نغديك
امرنى سيدى بذلك
مدام سيادك غرروا بيك
ينجوك بقى م المهالك

وفى البساتين قمصان جريده
يا حرامى يا عبد الحرامى
من كل شجره جاب جريده
فين تاكل؟ وفين تنامى

اخد نصيبه وعرف اللى فيه
ولفاه الجواب فى ايدك
قال ادى جوابك وديه
كما شفت احكى لسيدك

العبد اخد الجواب راح
لسيده سرحان وجاله
طاير وسابق نسمة الراح

وبيئن م اللى جراله

قاله رأيت يا سيدى العجوبات
صوره لسبع ماسك يمانى
طفل لكن عم الفتوات
واللى يروح مايعودش تانى

قسما برب العالمين
ده فى الحرب ما ليه نهايه
ولا مركبه ترسى على مين
وحكايته حاتكون حكايه

دخلت عليه وفاكرنى ليه(ذو مقام)
بعينه عدلنى وكفانى
بص بعيونه عليه

كأنى لبست الكفانى

قال سرحان الامر لله
يا وعدى يا شوم حالى
عبد وطفل وقصيره يداه
ومقدرش اطوله برجالى

قال الراجل فى البلا يبان
ما قدر يكون يا هلايل
يمكن ينصرنا الرحمن
عالعبد ابو باع طايل

قالوله الرجال الجميع لبيك
ادينا كلنا طايعينك
اجسامنا فى هدومنا لبيك(ملابسنا اكفاننا)
ادينا شمالك يمينك
قال سرحان يبقى الامر مفوض الى الله
يا وعدى يا شوم حالى
ويا العبد ده يا مرة يا بلاه
مدام قاتل اعظم رجالى

استعدوا يا بنى هلال
نوم الليل معادينى
بكره سوق القتال
قال ابن نايل اّدينى

عسقل قال ضمان الحرب بكره عليه
ابيع الملك والرهونى
لاقطع العبد بيديا
قليل الادب وروهونى

بكره لافرج الكل عليه
واسحب سلاحى الحدادى
واخليك تنظر بعينيك
لما ارميه عشا للحدادى


كانت خضره مشغولة البال والفكر لم تنم ليلتها فأذا كانت جيوش الهلايل
قد وصلت فأن فارسهم الاول زوجها رزق بن نايل هو من

سيطلب النزال وان فعل فسوف يبرز له ابو زيد ابنه الذى لا يعرفه ولايعرف
ايضا ان خضره موجوده فى ارض الملك فاضل .


فى الصباح دقت طبول الحرب وخرجت خضره وجاريتها سعيده و نجديه يحرسهم
ابو القمصان عبد ابو زيد وابن سعيده الى الميدان .
كانت عيون خضره تبحث عن رزق دون ان تشعر .
اصابها القلق لعدم وجوده مما اثار غضب الجاريه سعيده . طلب فارس بنى هلال النزال ولوح

بسيفه فى الهواء . عرفته خضره وسعيده انه عسقل الذى افترى عليها واتهمها كاذبا بالفحش وقد جاء الوقت الذى تجرعه فيه من نفس الكأس .

باتو كما زيت يغلى على النار
عسقل يلوج بعيونه
يقول ميتى يطلع النهار
كل منهو يحفظ قانونه

قالت الشريفه ياندمى
كيف العمل يا سعيده
ياريت قبل دى كان عدمى
شقيت و كنت السعيده

قالتلها ام قمصان
اوعى تقوليله حاجه
اصبرى لحكم الرحمن
لا نقص ولا زياده

واللى كتبه ربك
هو تشوفه عيونك
يا شريفه وفى عز كربك
زينه احفظى قانونك

ضربت طبول الحروبات
فى الصبح ركبوا وراحت
ركبوا وراهم الصبايات
دموع النسا ناحت


خضره بتبص بالعين
اتعجبت عاللى حاصل

يعنى العرب قاعده صفين
لكن رزق ما بينش واصل


قالتلها الجاريه من الله الكريم اطلبى رزق
يا صبيه زايد عباطك
ايه اللى شوفتيه خير من رزق
بعتك وابنك بيبكى فى باطك

على حضنك ينوح وهو اطفال
وقال هذا الولد مش ضنايا
انا اريده ماخطرلكش على بال
اخر كلام للنهايه

قالت برضه كله جرى منه
ولكن حبيبى و حليلى
انا من شماله ليمنه
ولا شىء فى بعده حليلى

ضربت طبول الحروبات
وظهر عسقل ابن نايل
تقدم و جر السلاحات
حراقى اللقا يا قبايل

من البعد لما برزله وجاه
زربون ارمى السلاحى
كم مثلك قطعت رجاه
والله ماعطيك سماحه



الجاريه بصت خدت بال
تخبت قوى فى غطاها
ومالت على ابو زيد بسؤال
وخضره تممت وراها

قالتله يا سيدى يا حلو دمك
اللى حصللى ما راحش
اهو ده بهدل الوالده امك
تهمها فى امر الفواحش

قال اومال كنتوا فين
يوم الواطى مالقاكم
قالتله اه يا قرة العين
كنا فى الحج وعلمناكم

كنا فى الدرب الطويل
فى الحجاز ومسافرين
قابلنا اللئيم العويل
بهدلنا شمال ويمين

قوم حلف الاسمر بالايمان
جرد عليه اليمانى
مدام بهدل عرض النسوان
الكلب ما يعيش ولا يوم تانى
وبرز عليه تحلف اسدين
خدوا بعضهم بالقضايب
فوقهم حجل غراب البين
والسبع سوى العجايب

والاثنين نزلوا بضربات
تهز الجبال الرواسخ
الحى فيهم كمن مات

بقى طعنهم مر ماسخ

قوم البيض قالت يا نظرى
اخر بلاوى وجاهه(جائته)
يا بين كتبت عدمى
دموع المفارق وجاهه(متوهجه)

عسقل يعتدل ويندار
وابو زيد كا غول جاله
سيف البلا والعه نار
انشغل فكره وباله

الاتنين على بعض ضربات
تهز الجبال الرواسى
اخر بلوى وحركات
ادى الناس ولا بلاشى

سوق البلا ليه زنه
يومها الغبار له شبارى
وبكت ناحت كل زنه
من فوق عالى الشبارى

م الصبح لما قرب الضهر
لما اللون غير بصاره
مابين الرجال عقب الدهر
الاتنين مالقيوا بصارا

زادوا البلا قرب العصر
وكل سيف تهاشم
اتوسلوا باّّّل بيت مصر
اّدى ساعتك يا ام هاشم

البيض حلت شعورها
لعسقل والاسمر سلامه
زلزلوا البلد وسورها
ضنين لو رجع بالسلامه

عسقل اتاله بكربه
على قد عرضه وطوله
وضرب على السبع حربه
مال الاسد ردهوله

ابو زيد ابصر عمل كيف
فتوه والعقل راوى
ميل عليه طعنه بالسيف
راحله فى فرش الكلاوى

وجذبه الفتى السبع ورماه
على الارض جابه نصفانى
تقول بحر طفت ورماه
دى حكمة اللى نشانى


قال الملك سرحان اخ يا بلاى
ادى اول نفر يا هلايل
انا اللى انشغل الفكر وبلاى
عليه العوض فى ابن نايل

عليه العوض فى ابن عمى
جابتنى راضى اللهايب
انا غرقت فى بحر همى
مات عسقل ورزق غايب

مات عسقل يا حاضرين
نوم الليالى معادينى
اللى ينزل الحرب مين
قال حسن الهلالى ادينى

انا الزعيم ابن سرحان
انا الفتى ولد الدريدى
على حسنا البل سرحان
لاسقى العبد كاس الدريدى

لاسقيه و فى الحرب اردى
انا السبع ولد الهلالى
ده خسيس واصله يردى
فى يوم البلا والقتالى


زعل سرحان وقلبه انضر
ده حسن ده اغلا عيالى
الدهر حالف لا ينضر
ومالت عليه الليالى

اصيبت قبائل بنى هلال وحلفائها بالوجوم . كان الصمت مطبقا ولم يجرؤ اى فارس على التقدم الى الميدان لمواجهة هذا المرعب الذى

قصم فارسا الى نصفين بضربه واحده من سيفه . هناك فرق بين الشجاعه والتهور ومواجهة مثل هذا الفارس ليست تهور فقط ولكنه تهور لدرجة الحمق .


انا استعين بالله واصلى على النبى

نبى عربى ركب البراق وسار

نبى الهدى لولاه ما نعرف الهدى

قطع العدا بالمرهف البتار

عليك صلاة الله يا خير من هدى


يا نور العيون يا صفوة الغفار

بعد مدحى فى جمال محمد

اقرأ لقولى وافهم الاشعار

يقول الفتى حسن الهلالى ابو على

بقلب انضنى لما انكوى بالنار

من الايام يا كبر بلوتى

كريه الليالى بتتوه الافكار

دنيا اذا ولت سريع انقلابها

تجدها رديه مالها مقدار

يادى العجوبه اللى جرت فى بلادنا

ولا كان حسابى ان الزمان غدار

العبد هدد دولة العز والعرب

انا ارد العبد واحمى الدار

انا ابو سرحان انا غايظ العدا

انا الدريدى صاحب المقدار

بكره لاجر السيف وافرج همتى

واخلى دماهم عالثرى ابحار

واهجم واجيب العبد م البعد طايع

واخلى نساهم حالله الاشعار

استغفر الله العظيم من الخطأ

الهى تعالى مقتدر غفار



فرغ الدريدى حسن من الكلمات

قال ولد يوم ما يعيش يومان
انا زعيم العرب وفرشى كليمات
للحرب جر اليمانى

سحب السلاح ابو على وهز القنايات
وركبت فى خلفه رجاله
خلا دموع العدا تجرى قنوات
سلطان محلا ريجاله

تقدم الى نواحى الميدان
قال اللى يفتح باب انا اسيده
اين العوبيد متى ظهر بان
كيف يعلو على وانا سيده

انا الدريدى انا ولد سرحان
اخضع يا ابن الجلايب
انا على حسى الجمال (الابل ) سرحان
اعمل لسيدك حسايب

نداله الهلالى وقاله
يابو طبش هدى ف كلامك
شيخ العرب العيب قله
يا سلطان حسن كلامك

اعلم انا عبد ربى
وكل الدول فاهمانى
من حال صغرى مرباى
اخللى العدا فاهمانى

ادى الحرب يالا انزل معاى
بلاش م العبد والسياده
رامى الحمل على مولاى
من الله طالب الزياده


خدوا بعض الاتنين بضربات
على بعض قربوا الركايب
لما بقيت اخر حركات
ابو على سوى العجايب

ابو زيد هز المبتر
الاتنين اسوده كواسر
وصرخ قال الله اكبر
ما عطا اهانات واصل

الاتنين خدوا بعض ضربات
يهدوا الجبال الرواسخ
دموع المفارق بلا رباط
كان طعنهم مر ماسخ

من الصبح لما قرب الضهر
واتحيرت الخلايق
عرق البهمه نزل نهر
م الزهق قلعوا الخلايق

خدوا بعض الاتنين بسلاح
يعلوا لما العصر جاهم
فجر المنيه بزغ لاح
البين شحطط نياهم

ابو زيد هز المبتر
الاتنين اسوده فوارس

وصرخ قال الله اكبر
الموت غيطان وانا وارث

ابو على قام عرض وجاه
على زى عرضه وطوله
وبرمح بيده رماه
سلامه البطل ردهوله

ابو زيد ميل حايرميه
الحمل طحن الغرايب
حسن شاف راح تيجى فيه
انهزم وولى هرايب

انهزم الدريدى وولا الادبار
ودفع الكحيله سلامه
لما وصلوا لغاية الديوان
وحسن نفد البطل بالسلامه

لكن ميتا الاسوده كالرعيان
عشنا ورأينا العجايب

سخر غانم وابنه دياب من هروب حسن الدريدى امام ابو زيد ولم يكن الملك سرحان فى حاله تسمح بأن يتحمل تلك السخريه

فقد كان يحمد الله فى داخله على نجاة ابنه من هذا النزال ولكى يكتسب دياب مركزا مرموقا فى القبائل طلب ان يقوم هو بمنازلة

ابو زيد لكى يثبت انه اقوى من السلطان حسن ووافق الملك سرحان لانه لم يكن امامه غير ذلك .


لما ولا حسن ضحك غانم مع دياب
قالوا عشنا ورأينا العجايب
حسن يخاف ويجرى يولى
من عبد ابن جلايب
كيف العمل يوم وليه ( ولايته)
اهو ضاع حسب العرايب

نادى الدريدى جوابهم
احنا كبار قباله
كلامكم معايا جوابهم
مين فيكم يحارب قباله

قال دياب انا اللى اروح ليه
واجيبه ضامنه بأيدى
وافنى عمر وروح ليه
انا دياب اللى غالب نديده

انا افنى عمره دى والروح
واوضب الكلب بأيدى
انا دياب ابو عزم براح
انا اللى غايظنى ابيده

ركب دياب لما هجمله وجاه
تلقاه لاسمر سلامه
وخد منه فى الحرب وعطاه
ما طلبش وياه ياما

يدوب وصلوا لساعتين
مع بعض هزوا القنايا
البيض طلوله بالعين
لقيوه فوق النهايه

عامللى فارس وزغبى
وانت حالتك ندامه
اصلب لاهوال حربى
مش راح تدوق السلامه

صرخ دياب وجه بكربه
على قد نظره ما شايف
وضرب على ابو زيد حربه
راح مقدم العود هايف

ابو زيد ميل ح يرميه
اتارى الزغبى (دياب ) واعيله
تقول بحر بيخبط وروميه
ووراه دوله واعيله

ميل على كحيلته وقال
دياب ميل على كحيلته وقال
مين يفتح الباب لسيده
الحموله النهارده تقال
يا حلوه سيرى بسيدك

ولى دياب ولى الادبار
قال دمعى بيهطل يامه

اتاريه العبد راجل صاحب مقدار
وصدق حسن فى كلامه

قال سرحان اومال ليه تضحك انت وابوك
لما ولدى م الموت نفد بالسلامه
والله لازم بعينك نوروك
ادى البلا والندامه

ياغانم اركب وروح ليه
ولدك و ولا هرايب
معدول شردك وروح ليه
ويبان لنا كل عايب



الان وبعد 14 عام وقع غانم فى يد خضره الشريفه لتقتص منه عندما امره الملك سرحان بمنازلة الفارس الاسود ابو زيد .


غانم قاله حاركب واروح فين
عزمى ماعدش يكافى
ده واد عبد فاجر عايب عين
يا سرحان من كلامك يكافى

حلفله السلطان بالايمان
لتركب تلاقى الاعادى
ومن يتم قوله بلا ايمان
عيبه اللى يخلف ميعادى

ركب غانم بعد اليمين
وقال امرى للى نشانى
ولد يوم مايعيش يومين
الرب يرأف بشانى

لما ظهر م البساتين
للميدان بارز ورايح
م البعد طلوا النساوين
يا ساتر من الفضايح

الجاريه واخده البال
سعيده بعينها تراعى
شافت غانم برز عالبال
ودموعه تجرى تراعى

قالتله يا سيدى اسمر اللون
الراجل ده اللى جايك
اسمعلى كلام موزون
ارسيك عاللى جايه



الراجل ده اصله فتان(يتسبب فى الفتن)
وسبب ما كانوا هانونا
ياكل حاصل لقوتان
اهو خلا العدا يبهدلونا

حلقوا علينا فى الحجاز
واحنا رايحين نزوروا نبينا
ملقناش ولا ذول حجاز
والصبر خدته نابينا

قوم قسم له يمين ابو زيد
جرد عليه اليمانى
الفخر والعز بيزيد
ان جه شمال اجى يمانى

قالتله مسخره واوعى تأذيه
قالتله مسخره واوعى تأذيه
علشان ده كبير شايب
بس عايزين تظهر العيب فيه

يظهر انه ده ذول فى القوم عايب

ح ابهدله يا سعيده
ومش ح اذيه واصل
وروحى انتى يا سعيده
حدفعه تمن اللى حاصل

تقدم من البعد شاشا بيداه
غانم من بعيد يشاشى بيداه
ويقول يا ولدى كبير وقل حيلى
واللى يعمل الخير المولى بيداه
حلفوا عليه وجابونى بالغصب حيلى

سلامه قاله انزل يا عمى
مدام جيت لسوق القتالى
مدام راجل تلف عمى
ادى يمينها وادى الشمالى

برزوا على بعض الاتنين
يا لطيف يالله السلامه
قناديل فى الضلمه والعين
خلوها اخر ندامه

وييجى يهرب يولى
ابو زيد قوامك يحوشه
ابدا ما لاقى اوان ليه
لاقى الاسد مثل الوحوشه

غانم عيونه مساكين
تبحث ما لاقيه فضارى
واقعه حيطة البساتين
فى الشجر بلغ فرارى

فى الاشجار قام ولا
غانم فى الشجر ولا
وقدامه نزل هرايب
الاسمر كما قلعه حلا
خدوا علاوله قضايب

غانم عدا لجوه
محل الوعد كان فيها
وكان الجو مش جوه
كانت على غير وجيهه

الحادثه اللى ح تجرى
عامل واخد الرئاسه
عمته شبكت فى الشجره
تركها وراوح براسه


ساب عمته وراوح على طول
سرحان اتاريه واخدله باله
بعينه عليه البطل بيطل
لقيه جاى بدماغه قباله (برأسه عاريه )

بيقوله اومال فين العمه يا غندور
فى العز واخد وراثك
وجاى للنسوان يغنوا دور
اومال خبر ايه جاينى براسك

فين عمتك يا امير
(ارجع) عاود موت وهات العمامه
حلف لا ارجع ولا امر
تاريك راجل ما تخشى ملامه

يا سرحان تبقاش وشاش
الهم زادنى فى رزاله
اقتل روحى علشان دراعين شاش
بكره اشترى عشره بداله

قال سرحان اخ يا غلبى يا بلاى
ادى كبارنا والصغارى
البين شغل الفكر وبلاى
والبحر ما يطفى نارى

انا منى اتخبلت لف عمى
والعقل كاد يجينى
يا هلترا مين يجيبلى ابن عمى

ميتا رزق يصعب يجينى

فى غياب رزق نجعى ح يصبح خربان
يا مين يجيبلى ابن نايل
من يوم ماغاب مفيش فى النجع خير بان
تبكى عليه الهلايل

اسودت الدنيا فى عين الملك سرحان . لم يعد لديه اى امل فى ان يتقدم اى فارس من جيشه للمواجهه ولم يعد امامه سوى الاستسلام او طلب الهدنه وقد يرفض ابو زيد الهدنه

طلع سرحان حافى القدمين
وراه كبار النجع خاضعين
يبكى ملك العرب بدموع العين
والرجال ماشيه فى جاره وعاليمين

وصل للبطل اسمر اللون
فى الميدان قال يا حبيبى

انت سبع زكرك ملا الكون
يابو لون اسمر زبيبى

انا مقر لك بالحق
غيرك ما ولدت رجالى
واحنا اصل الدعا فينا حق
فى جيدنا ما عدش رجالى

انا غرقت فى بحر عمى
نوم الليل معادينى
معايا الاسد ولد عمى
غايب حابعتله يجينى

تعطينا مهله يا امير
متامالغايب يجينا
انا طعم الهم ده امر
ده انا العقل منى يجينى

سلامه قاله يا عم مدام جيتنى طلبك مجاب
الله يعلم بحالى
احنا ناس ربينا فيه اداب
عطيتكم الوعده تلات ليالى
عطيتك الوعده ثلاثة ايام

فرض ابو زيد شروطا قاسيه للهدنه ولم يكن امام الملك سرحان سوى قبولها بأمل وصول فارس العرب ابن عمه رزق ابن نايل

عطيتكم الوعده تلات ليالى
عطيتك الوعده ثلاثة ايام
بس الكلمه اسمعوها
عيونى فى دول حرمان ماتنام

ولازم طلباتى انا تنفذوها

قاله سرحان طبعا يابنى طلبك ينفذ
اى ماتأمر لازم احنا مطيعين
قاله طيب تمنعوا جمالك ع البساتين
ولا جمل يمس الجناين
لا اعنابها ولا التين
ولا ذول يخش الجناين

تمنعوا جمالكم عن البساتين
والجمل اللى يدخل ... لينا
لا تقربوا من عنب ولا تين
الروح عندى .. بتينه

وكمان اشرط عليكم متقيدوش نار
وادى الكلام واللى حاصل
ولا تعزموش ضيوف وخطار
ولا ذول غريب يدخل النجع واصل

وبالليل متولعوش نور
لازم تقعدوا عالظلايم
ان كنت للامر صبور
تمم لهذا المعالم

قال سرحان امرى الى الله
منا ما الغايب يجينا
شرطك يا ولدى اتبعناه
توسلنا ب طه نبينا


اضطر الملك سرحان للموافقه على شروط الهدنه الى ان ينجده ابن عمه فارس العرب رزق بن نايل . كتب له خطابا يستنجده وتطوع دياب بالبحث عنه وتسليمه الخطاب حيث لا يعلم احد مكانه منذ 14 عام


قال الملك سرحان الامر لله

لحين ما غايبنا يجينا
شرطك يا بنى قبلناه
قدام كل اللى لينا

ومين يودى الجواب
لرزق . الامير . ابن نايل
مين يعرف اعز الاحباب
يقوله احتاجوك عرب الهلايل

وكتب جواب لرزق يقوله
ظهر عبد فى بلاد فاضل
عزم الكبار فينا قله
مخلاش ولا حد فاضل

وقرب ينهب النساوين
ياخدوا النسا يزفروها
لوجودك احنا محتاجين
بلادنا حا يخربوها

ظهر عبد فى بلاد زحلان
فتوه والباع طايل
ما غلبه اى انسان
وقتل عطوان وجايل

وجاسر وداغر وجسار
وافنى رجال العقيلى
ولو انه طفل وصغار
حاجه تطير بالعقيلى


الحقنا يا ابن عمى
ارجوك ما تبطيش واصل
الغلب بقى ريحه يعمى
وادينى قلتلك ع اللى حاصل

وحط ختمه عا الجواب
قال . مين يروح لابن نايل؟
قام قال الفتى دياب
انا الاقيه وسط الجبايل

جابوله هجين يسبق الريح
يا ترى انت فين يا بن نايل
ناسك هنا مجاريح
وفين انت يا سبع الهلايل؟

ركب ابن غانم عا لهجين
وقال يا رب انت المعين
تدلنى على طريق رزق
فى صحرا ولا ف جبال
ده امر يديق الرزق
غير رزق ما فيه رجال

اتارى مع الكرامات
يا قارىء دوق الروايه
رزق ساكن جبل اسمه الكرومات

زرع ريف وبنى سرايه


عايش رزق وسط الجبال
هو ونجاح وشيحه
عايش فقير ذليل الحال
هو وبنته المليحه

ولا ذيه راجل تتلفله عام(عمامه)
منفى . وحزنان . وصابر
فضل هنا اربعتاشر عام
عيونه ما شافوا الاكابر

شيحه بتنظر على بعد
بعيونها الواهجينه
ابوها قاعد على الارض
قالتله فيه ذول راكب هجينه

رزق هنا من اربعتاشر عام
والله خساره السبع كان حظه وافر
ولكن ماسخ عليه الزاد والطعام
لاحلق طول السنين ولا قص الضوافر


خرج رزق يلاقى الامير
كأنه غول الجبالى
مع انه ضخم وكبير
قال دياب يا مر حالى

ترائا له غول م الجبال
قال يام هاشم نجينا
من كتر ما اتلخبط بيه الحال
وقع من فوق الهجينه

قاله وحياة طولك وعرضك
انا ماشى با اجد سيرى
لسانى ما يقدر يعارضك
وحيد ابويا .. مامعاهش غيرى

انا عقلى غايب ومشغول
وحتى ما شايف بعينى
انا فى عرضك يا غول
ارجوك اوعى تأذينى

انا من عرب بنى هلال
ماشى والحمل مايل

وقعت سراية بنى هلال
وشردوا منها الهلايل

انا ولد غانم .. اسمى دياب
باعتينى .. لاسد العروبه
اجيب رزق اللى غاب
وترك النجوع مخروبه

رزق قال كل البلاوى ولا دى
يا مولاى الطف بحالى
انا .... رزق .... ياولدى
اللى جارت عليه الليالى


يا شيحه ده نديد ولدى

قالتله عارفه يا با يا
لا نفعت فى ديك ولا دى
مات ولا عايش ضنايا

يا ترى يا خضره فى اى مكان؟
يا ترى ربيته فى بيت ابوها؟
يا ترى وصلت روضة العدنان؟
ولا عدا فى الطريق بهدلوها؟

قالتله شيحه اقرا الجواب
النوح ممنوش فلاحه
قراه عقله الذكى غاب
والهم هبت رياحه

مسك الجواب تانى وقراه
وفهم جميع الروايه
فهم رموزه ومعناه
وقال . اتعجبى يا ضنايا

قالتله يا با ايه فى الجواب
ضيقت منى الخلايق
ايه اللى خلا دماغك غاب ؟
وحق خالق الخلايق

قال يا بنتى امرى لمولاى
باعت الجواب ابن نايل
قال البين علينا جاى
فيه عبد هزم الهلايل



مقدرش اهدى ولا ارتاح
غير لما اشوفه بعينى
مدام بعزق المجد فى الراح(الريح)
فى قلبى النيران والعينى

قالتله بنته يابا استعجل وقوم
وان شاء الله يريد رب الخلايق
راجل ليك مقدار معاه قوم
دى مستنظراك الخلايق

نزل الامير فارس كبير
انا وانتوا نصلى على طه البشير




نزل يسرج عالكحيله بيده

اربعتاشر سنه للريف ماراحت

راجل الفرسنه كار جده

فى تلك اليوم دى عيونه ناحت

جنب الكحيله فيه ساقيه بتدور

فى الريف تحت الجبالى

التفت البطل ساطع النور

قوم السهم جضه يلالى

قوم مثل السهم للنوح

قال حملى على الكتف مالك

انا بابكى على مراتى وابنى والدمع بالوح

وانت خشب بتجض مالك

وصار ينشد قبال سهم الساقيه رزق بن نايل ويمثل ويقول

اول كلامه اصلى على الرسول

تنسمت الارياح فى مولد النبى

نبى عربى ازكى البرايا حبيبها

يا سعد من اكثر صلاته على النبى

ويا سعد من راح زار مكه وشم طيبها

من بعد تمجيدى فى جمال محمد

اقرأ كلام شعرى اموره عجيبها

يقول الفتى رزق الامير ابن نايل

ابكى على بيض الليالى وطيبها

غلبتننا الايام رضيت بغلبها

ولا تغلب الايام سوى من رضى بها

يا محسن العشره مع جيرة الهنا

يا مصعب الفرقه على من بلى بها

يا سهم انا بانوح مفارق احبتى

وانت بتبكى ليه امورك عجيبها



يارب من كان السبب فى فراقنا

تبلاه بطعنه لم يلاقى طبيبها

وتحرمه يا مولاى من اهله ومنزله

ويعدم ولاده ويشوف فرقه وصعيبها

يا سهم انا بانوح مفارق احبتى

وانت جاوبنى ليه بتبكى نجيبها

اجابه لسان الحال عن السهم قال له

يا رزق انا ليه حكايه صعيبها

يارزق انا كنت شجره مظله

يتظلل من تحت ظلى حبيبها

وكان يبات الطير فوقى مأمن

خوفا ليأكله وحش الفلا ولا ذئبها


اشار مشير السوء وقال اقطعوا دى

فيها مصالح من معانى عجيبها

فجابوا لى النجار والخصم واقف

وقطعونى يا رزق والله صعيبها

كحتوا على جذورى وبانت مساندى

واصفر لونى بعد شرب رضيبها

فقسمونى تلات كيمان يابن نايل(اكوام)

سبحان ربى اللى مفرق نصيبها

التلت منى عملوه منابر مساجد

فيها الجلاله وفيها زكر حبيبها

والتلت منى عملوا منه مراكب

ليلى نهارى فى موجات وغريبها

والتلت باقى منه سهم وساقيه

هنا اسقى ماء وهنا اولع لهيبها

وادى حكايتى يا بن نايل وقصتى

والله قادر يهون صعيبها


سمع الكلام رزق ولقاه
مطابق الحال تمامى
كان القول بره ولا جواه
لكن سمعه بالتمامى

قال انا برضه شجره مظله
لكن قطعوها الحبايب
من يومها ما عرفت ظله
ومن يومها عشت غايب

ايه الاسف راح يفيدك
يا رزق وسط الليالى
لا فى جيبك ولا فى ايدك
قوم يا بطل لاتبالى

اخذ رزق ابنته شيحه و دياب والعبد نجاح معه وانطلق الى مضارب الزحلان لنجدة قبيلته من سطوة ذلك العبد الزربون الاسود .


بعد المغرب وصل الحدين(الحدود)
اتلقوه امرد وشايب
عاقد سلاحه حامى الحدين
يخزم شنب كل عايب

اتلقاه سرحان واهاليه
وغنوا سلامة الغايب
قالوا انتهى المر وهواليه
مدام حضر زعيم العرايب

سلموا عليه الجمع كله
وجلسوه ع الفراشى
سووا طعام ياكله
ظلام والطعام ما اتاشى

ساعتها كان العشا فات
يا مولاى زيح الظلايم
حضر زادهم والعشا فات
انما الدنيا .. كحله .. ظلايم

رزق قال يا سلام سلم
ضيقتوا منى الخلايق
يا سرحان مال نجعك مضلم
ما شيفاش بعض الخلايق
قاله العبد حاكم عليا
وعلى اقرار ختمونى
فى الليل لا نور يعرف عنيه
وان حد نور يبهدلونى

مقدرش حتى اولع نور
وانا قبلت من اضطرارى
وادينى عا الغلب صبور
لكن البحر ما يطفى نارى

جه واقف رزق عالقدمين
وقال اسمع ياراجل كلامى
انا سبع الاصول القديمين
انا بطل فرشى كلامى

واقسم يا بطل بالله
لتولعوا النور خالص
اللى دموعى دى بلاه
انا سبع بقلب خالص


يا رجال هيا اسمعوا دى
قص العميمه تلاته
اللى بيولع فى خيمته نورين
بيمين يولع تلاته

عبد مين تتهددوا بيه
لاقطعه باليمانى
واحرق جدوده وابيه
وغضب رزق وحلف يمانى


سطع النور وزاد مجال

سطع النور وسطع المجال

وغنت بنات الهلايل

وتم الصفا فى بنى هلال

لما حضر ولد نايل

سلامه من القصر بيطل
وبيبص يم النواحى
لقى النور ساطع الكل
النور من كل النواحى

قال اومال سرحان خلف الكلام ليه
انا فرشى مصدق بكلامى
مفيش حد عنده كلوم ليه
اشوف دى خالف كلامى

ولكن فكر فى نفسه وقال
دوله رجال الحظ بايت حداهم
تلقا ولع النور اطفال

اظن ان غايبهم اتاهم

ولكن فى الصباح برضه اوريه
اشوف غايبهم ده يعمل ايه معايا
وفضل يفكر بالفكر والريه
من الله طالب معينا

صبح الصباح صلوا عالزين
وركب ولد الشريفه
وراه النساوين الاتنين
الجاريه وخضره الشريفه

والتالته نجديه
الكل يبقوا تلاته
معاهم نسبة نبيا
يخلوا العدو لسانه تلاته

عندما برزوا على النجع
وشافوا بعيد الخلايق
وهز القنا الاسمر السبع
جضت عموم الخلايق

برز ابن نايل على المهره كالغول
زمان ما طوح قناته
عالسرج جالس معدول
العرب يحلفوا بحياته

شافته الشريفه وقلبها لان
اصله كل منهو سعيده
والله انا خايفه م القلب وهولان
ليضيع منهم نفر يا سعيده

سعيده ما بيا راجلى ما بيا ولدى
انا جسمى كما النار غالى
كل المصايب يا جاريه ولا دى
ولدى وزوجى والكل غالى


كان موقفا عصيبا ان يتواجه الاب والابن فى معركه حتى الموت دون ان يعرف الابن انه يحارب ابوه او يعرف الاب انه يبذل جهده لكى يقتل ابنه



قالتلها الجاريه صلى على الزين

اوعى كلمتك توضحيها

ليتعبوا هما الاتنين

اسرارنا اكتميها


واعلمى ما قدر يكون

ما حدش يعدل البخت بأيده

لما يأمر من عمر الكون

والذول يصبر على حكم سيده


رزق الاول بعت نجاح
بخطاب واضحه حروفه
ان مجاش الرد نجتاح
كله مصيره يشوفه

اتفضل يا خالى نغديك
ده قمصان وده حاله
يا خالى بالروح نفديك
ولا ده ابن اخته ولا ده خاله

تاريها الشريفه فوق شايفاه
من عالهجن هى وسعيده
شافت الواد خاطف اباه
وعارفه حكاية الجريده

قالت سعيده ده نصيب الاتنين
ماقدرش اظهر وابان
حايعرفوا المصلحه فين
والمستور ساعتها يبان

يا شريفه شاورى لقمصان
خليه ما يأذيهش واصل
طلبتى منه قبل كده وكان
مش حامله شى م اللى حاصل


شاورت الشريفه لابو قمصان
قمصان جاها بكل راحه
قالتله يا فارس يا عجبان
خد العبد بكل راحه

عيب يقولوا عرب الزحلان
هانوا عبد يسوى الدراهم
ده جرح يفضل على طول ورمان
ولا تداويه البراهم(المراهم)

اعلم يا عبدى ده راجل مرباى
ما قالش ولا قول عايب
جاب الخطاب وده حكم رباى
اللى يئذى الضيف عايب

قالها سمعا وطاعه
ياللى كلمتك نسمعوها
طاوعناها فى الرضاعه
دلوقتى حنهملوها؟

قالتله خد الزاد وغذيه
وكلمه بكل راحه
وخليه يقول ما عنديه
واللى حصل بالصراحه

اخد الاكل قاله تفضل
قرب يا خال ع الطعامى
وانا اللى منك يفضل

يسعدنى ده يكون طعامى

قاله اتفضل يا خال
اصل ظروفك جت جميله
انا كنت عايز اسقيك الخال(الخل)
لكن جميله بجميله
نفجر ابو زيد غاضبا عندما عرف ان ابو القمصان قد اكرم العبد ولم يفعل به ما فعله بعبد الملك سرحان


جرى ايه لخبطت امرى
يا قمصان مانتاش عبيدى
ما خالفتنيش طول عمرى
اياك حن عرق العبيدى

قاله عشانك وعشان امى
مالوش ولا ذنب فى اللى حاصل
قلت زى خالى وعمى
وحلفت ما اضره بأيدى واصل

قاله يا سلامه اصنع معاه الموده
ده راجل جاى حامل رسايل
ان جاب لنا ولا ودا
اعتبره صندوق وشايل

نجاح اخد الجواب راح
جواب يسم البدانى
لرزق اهو عاد نجاح
قاله اللى يروح ما يعودش تانى

انا عبدك وانت ربيت
خليتنى احب الصراحه
وبقيت واحد م البيت
مع عدوك حسيت براحه

قاله رأيت يا سيدى العجوبات
ولد كما السبع جارر يمانى
اسود . اه . لكن عم الفتوات
واللى يروح ما يعودش تانى

قسما برب العالمين
فى الحرب ما ليه نهايه
لا مركبه حا ترسى على مين
وحكايته اغرب حكايه

تأمل رزق فى الكلام
قال مين فى الدنيا لسه همام

وكمان اسود اللون
نور بصيرتى يا اله الكون


اما فى الميدان
كانت خضره فى قلق
ويصب منها العرق
وتقرا قل اعوذ برب الفلق